ഗുജറാത്ത് തീര മേഖലയിൽ ആഞ്ഞടിച്ച് ബിപോർജോയ് ചുഴലിക്കാറ്റ്: രണ്ട് പേർ മരണപ്പെട്ടു

ഗുജറാത്ത് തീര മേഖലയിൽ ആഞ്ഞടിച്ച് ബിപോർജോയ് ചുഴലിക്കാറ്റ്. രണ്ട് പേർ മരണപ്പെട്ടു. 22ഓളം പേർക്ക് പരിക്കേറ്റു. 125 കിലോമീറ്റർ വരെ വേഗതയിൽ വീശിയ കാറ്റിൽ നിരവധി നാശ നഷ്ടങ്ങളുണ്ടായി. നിരവധി വീടുകളുടെ മേൽക്കൂരകൾ കാറ്റിൽ പറന്നു. ​കടലില്‍ തിരകള്‍ മൂന്നു മീറ്ററിലേറെ ഉയര്‍ന്നു പ്രക്ഷുബ്ധമായി. കാറ്റിൽ 500ഓളം മരങ്ങൾ കടപുഴകി വീണു.

മരം വീണ് 3 പേർക്ക് പരിക്കേറ്റു. 940 ​ഗ്രാമങ്ങളിൽ വൈദ്യുതി ബന്ധം പൂർണമായി വിച്ഛേദിക്കപ്പെട്ടു. എട്ടു തീരദേശജില്ലകളില്‍ നിന്നായി ഒരു ലക്ഷത്തിലേറെപ്പേരെ ഇതിനകം ഒഴിപ്പിച്ചിട്ടുണ്ട്. സൗരാഷ്ട്ര കച്ച് മേഖലകളിൽ റെഡ് അലർട്ട് പ്രഖ്യാപിച്ചിട്ടുണ്ട്. നൂറോളം ട്രെയിനുകളും റദ്ദാക്കി. നിലവിൽ കാറ്റ് രാജസ്ഥാൻ ഭാ​ഗത്തേക്കാണ് നീങ്ങുന്നത്. രാജസ്ഥാനിൽ കനത്ത മഴ മുന്നറിയിപ്പുണ്ട്. കാറ്റിന്റെ വേ​ഗത കുറഞ്ഞതായും റിപ്പോർട്ടുണ്ട്.