അൽ നസർ സൂപ്പർ താരത്തെ ടീമിൽ നിന്ന് ഒഴിവാക്കും; പണി കിട്ടുക ക്രിസ്റ്റ്യാനോ റൊണാൾഡോയ്‌ക്കൊപ്പം ഗോളടിച്ചുകൂട്ടുന്ന കളിക്കാരന്
പോർച്ചുഗൽ സൂപ്പർ ഫുട്‌ബോളർ ക്രിസ്റ്റ്യാനോ റൊണാൾഡോയുടെ ( Cristiano Ronaldo ) സൗദി ക്ലബ്ബായ അൽ നസർ എഫ്സി (Al Nassr F C) യുടെ ഒരു വിദേശ താരം പുറത്തായേക്കുമെന്ന് സൂചന. എഎഫ്സി നിയമത്തിന്റെ അടിസ്ഥാനത്തിലാണ് ഒരു വിദേശ താരം അൽ നസർ എഫ്സിക്ക് പുറത്തു പോകുകയെന്നാണ് ലഭിക്കുന്ന സൂചനകൾ. അതിന്റെ ആദ്യ സൂചനകൾ എഎഫ്സി ചാമ്പ്യൻസ് ലീഗിനുള്ള ടീം അംഗങ്ങളുടെ രജിസ്‌ട്രേഷനിൽ ലഭിച്ചു.
2021 മുതൽ അൽ നസർ എഫ് സിയിലുള്ള ബ്രസീൽ അറ്റാക്കിങ് മിഡ്ഫീൽഡർ / ഫോർവേഡ് താരമായ ആൻഡേഴ്‌സൺ ടലിസ്‌കയാണ് ( Anderson Talisca ) അൽ നസർ എഫ്സി വിട്ട് പുറത്തു പോകാൻ സാധ്യതയുള്ളത്. 2023 ഏപ്രിലിലാണ് ആൻഡേഴ്‌സൺ ടലിസ്‌കയുടെ കരാർ അൽ നസർ എഫ് സി പുതുക്കിയത്. പുതുക്കിയ കരാർ പ്രകാരം 2026 ജൂൺ 30 വരെ ബ്രസീൽ താരത്തിന് അൽ നസർ എഫ് സിയിൽ തുടരാം.
എന്നാൽ, എഎഫ്സി നിയമപ്രകാരം ഒരു ക്ലബ്ബിന് ആറ് വിദേശ താരങ്ങളെ മാത്രമാണ് ഓരോ സീസണിലും കരാറിൽ എടുക്കാൻ സാധിക്കൂ. അതിൽ ഒരു താരം എഎഫ്സി റീജിയനിൽ നിന്നുള്ളതായിരിക്കുകയും വേണം. എ എഫ് സി പരിധിക്ക് പുറത്ത് ജനിച്ച അഞ്ച് വിദേശ കളിക്കാരെ മാത്രമേ ക്ലബ്ബുകൾക്ക് രജിസ്റ്റർ ചെയ്യാൻ സാധിക്കൂ.
2023 – 2024 എ എഫ് സി ചാമ്പ്യൻസ് ലീഗിനുള്ള രജിസ്‌ട്രേഷനിൽ ടാലിസ്‌കയെ അൽ നസർ എഫ് സി ഉൾപ്പെടുത്തിയിട്ടില്ല എന്നതും ശ്രദ്ധേയം. ക്രിസ്റ്റ്യാനോ റൊണാൾഡോ, മാഴ്‌സെലൊ ബ്രൊസോവിച്ച്, സാദിയൊ മാനെ, സീക്കൊ ഫൊഫാന, അലക്‌സ് ടെല്ലസ് എന്നീ അഞ്ച് വിദേശ കളിക്കാരെയാണ് അൽ നസർ എഫ് സി, എ എഫ് സി ചാമ്പ്യൻസ് ലീഗിനായി രജിസ്റ്റർ ചെയ്തത്. അതോടെ ടാലിസ്‌കയുടെ അൽ നസർ എഫ് സിയിലെ ഭാവിയുടെ കാര്യം അനിശ്ചിതത്വത്തിലായി.
അതേസമയം എഎഫ്സി ചാമ്പ്യൻസ് ലീഗ് പ്ലേ ഓഫിൽ യുഎഇ ക്ലബ്ബായ ഷബാബ് അൽ അഹ്ലിക്ക് എതിരെ 4 – 2 ന്റെ ജയം അൽ നസർ എഫ് സി സ്വന്തമാക്കിയിരുന്നു. ടാലിസ്‌കയുടെ ഇരട്ട ഗോളാണ് അൽ നസർ എഫ സിക്ക് ജയം സമ്മാനിച്ചത്. 11, 90 +5 മിനിറ്റുകളിലായിരുന്നു അൽ നസർ എഫ് സിക്കു വേണ്ടി ടാലിസ്‌കയുടെ ഗോളുകൾ. ഈ മത്സരത്തിൽ പരാജയം മുന്നിൽക്കണ്ടതിന് ശേഷമായിരുന്നു അൽ നസറിന്റെ വിജയമെന്നതും ശ്രദ്ധേയം. 87 മിനിറ്റ് വരെ പിന്നിൽ നിന്ന കളിയിലാണ് പിന്നീട് മൂന്ന് ഗോളുകളടിച്ച് അൽ നസർ എഫ്സി 4-2 ന്‌ വിജയം സ്വന്തമാക്കിയത്‌. ഇഞ്ചുറി ടൈമിലായിരുന്നു ടീമിന്റെ മൂന്നാമത്തെയും നാലാമത്തെയും ഗോൾ പിറന്നത്.
അൽ നസർ എഫ് സിക്കു വേണ്ടി 68 മത്സരങ്ങളിൽ ടാലിസ്‌ക ബൂട്ട് അണിഞ്ഞിട്ടുണ്ട്. 39 ഗോൾ നേടി, 13 ഗോളിന് അസിസ്റ്റ് നടത്തി. 2021 ൽ ചൈനീസ് ക്ലബ്ബായ ഗ്വാങഷു എവർഗ്രാൻഡിൽ നിന്നായിരുന്നു ടാലിസ്‌ക അൽ നസർ എഫ് സിയിൽ എത്തിയത്. ബെൻഫിക, ബേഷിക്താസ് തുടങ്ങിയ ക്ലബ്ബുകൾക്കായും ബൂട്ടണിഞ്ഞിട്ടുണ്ട്. ക്ലബ് തലത്തിൽ ആകെ 324 മത്സരങ്ങൾ കളിച്ചു, 146 ഗോൾ നേടി, 41 ഗോളിന് അസിസ്റ്റ് ചെയ്തു.
