സമൂഹ മാധ്യമങ്ങളിലൂടെ പരിചയം സ്ഥാപിച്ച്‌ പണം തട്ടിപ്പ് പതിവാക്കിയ യുവാവ് പിടിയില്‍
മലപ്പുറം: സമൂഹ മാധ്യമങ്ങളിലൂടെ പരിചയം സ്ഥാപിച്ച്‌ പണം തട്ടല്‍ പതിവാക്കിയ യുവാവ് പെരിന്തല്‍മണ്ണയില്‍ പൊലീസിന്റെ പിടിയിലായി. വിവാഹ വാഗ്ദാനം നല്‍കി പട്ടികജാതിയില്‍പ്പെട്ട ഒരു പെണ്‍കുട്ടിയെ പീഡിപ്പിച്ച കേസില്‍ പിടിക്കപ്പെട്ടതോടെയാണ് ഇയാളുടെ തട്ടിപ്പുകള്‍ പുറത്തറിഞ്ഞത്.
കാസര്‍കോഡ് മധൂര്‍ സ്വദേശി മുഹമ്മദ് അന്‍സാറാണ് പിടിയിലായത്. പെണ്‍കുട്ടിയെ പീഡിപ്പിച്ചതിന് പട്ടികജാതി പീഡന നിരോധന വകുപ്പു പ്രകാരം കസ്റ്റഡിയിലെടുത്ത അന്‍സാറിനെ ചോദ്യം ചെയ്തതോടെയാണ് ഇയാള്‍ നിരവധി തട്ടിപ്പുകള്‍ നടത്തിയിട്ടുണ്ടെന്ന് പൊലീസിന് മനസിലായത്. സോഷ്യല്‍ മീഡിയയിലൂടെ ആളുകളെ സുഹൃത്തുക്കളാക്കുകയും പിന്നീട് ഇവരെ കബളിപ്പിച്ച്‌ പണം തട്ടുകയുമാണ് രീതി.
സിനിമയില്‍ അഭിനയിക്കാന്‍ അവസരം, വിദേശത്ത് ഉയര്‍ന്ന ശമ്പളത്തില്‍ ജോലി അടക്കമുള്ള വിവിധ വാഗ്ദാനങ്ങളിലൂടെ അന്‍സാര്‍ പലരില്‍ നിന്നായി തട്ടിയത് ലക്ഷങ്ങളാണ്. അന്‍സാര്‍ പിടിയിലായതോടെ തട്ടിപ്പിനിരയായ നിരവധി പേര്‍ പരാതിയുമായി പൊലീസിനെ സമീപിക്കുന്നുണ്ട്.
