അക്ഷരയാത്രയിൽ സാഹിത്യ സല്ലാപം; വായനയുടെ വെളിച്ചം പകർന്നു മോഹനൻ നടുവത്തൂർ
.
കൊയിലാണ്ടി: “സ്വയം പ്രകാശിക്കുന്ന ഒന്നിനു മാത്രമേ മറ്റൊരു പ്രകാശത്തിന് തിരികൊളുത്താൻ കഴിയൂ” എന്ന ഹൃദയസ്പർശിയായ സന്ദേശത്തോടെ പ്രശസ്ത സാഹിത്യകാരൻ മോഹനൻ നടുവത്തൂർ വിദ്യാർത്ഥികൾക്കിടയിൽ വായനയുടെ മഹത്വം പങ്കുവെച്ചു. വായനവാരാചരണത്തിന്റെ ഭാഗമായി ബി.ഇ.എം. യു.പി. സ്കൂൾ കൊയിലാണ്ടി സംഘടിപ്പിച്ച ‘അക്ഷരയാത്ര’ പരിപാടിയുടെ ഭാഗമായി വിയ്യൂർ വായനശാലയിൽ നടന്ന സാഹിത്യസല്ലാപത്തിൽ സംസാരിക്കുകയായിരുന്നു അദ്ദേഹം. പരിപാടിയിൽ നഗരസഭ കൗൺസിലർ പി.കെ. ഷൈജു മുഖ്യാതിഥിയായി.
.
.
വായന മനുഷ്യന്റെ ചിന്തകളെ ഉണർത്തുകയും ജീവിതത്തെ പ്രകാശമാനമാക്കുകയും ചെയ്യുന്ന ശക്തമായ ഉപാധിയാണെന്ന് അദ്ദേഹം പറഞ്ഞു. പുസ്തകങ്ങൾ അറിവിന്റെ കലവറ മാത്രമല്ല, മനുഷ്യനെ മാനവികതയിലേക്കും മൂല്യബോധത്തിലേക്കും നയിക്കുന്ന വഴികാട്ടികളുമാണെന്ന് അദ്ദേഹം വിദ്യാർത്ഥികളെ ഓർമ്മിപ്പിച്ചു. വായനയിലൂടെ ലഭിക്കുന്ന അനുഭവങ്ങളും അറിവുകളും സമൂഹത്തിൽ പുതിയ വെളിച്ചങ്ങൾ തെളിയിക്കാൻ സഹായിക്കുമെന്നും അദ്ദേഹം കൂട്ടിച്ചേർത്തു.
.
വായനശാലകൾ സമൂഹത്തിന്റെ സാംസ്കാരിക കേന്ദ്രങ്ങളാണെന്നും പുതിയ തലമുറയെ വായനയിലേക്ക് കൈപിടിച്ചുയർത്തുന്നതിൽ ഇത്തരം പരിപാടികൾ നിർണായക പങ്കുവഹിക്കുന്നുവെന്നും അദ്ദേഹം അഭിപ്രായപ്പെട്ടു. ഹെഡ്മാസ്റ്റർ ഷിനോയ് ലാസർ അധ്യക്ഷത വഹിച്ചു,
.
.
എം.പി. ജയചന്ദ്രൻ, രൂപേഷ് മഠത്തിൽ, വൈശാഖ് മുതുവീട്ടിൽ, ധന്യ കെ.സി, സിംജോ വി. ജോർജ്, ലൈബ്രേറിയൻ പ്രജിത എന്നിവർ ആശംസകൾ നേർന്ന് സംസാരിച്ചു. വിയ്യൂർ വായനശാല സെക്രട്ടറി പി.പി. രാധാകൃഷ്ണൻ സ്വാഗതമാശംസിച്ചു.
വിദ്യാർത്ഥികളുടെ സജീവ പങ്കാളിത്തവും സാഹിത്യകാരനുമായുള്ള സംവാദവും പരിപാടിയെ ശ്രദ്ധേയമാക്കി. വായനയുടെ ലോകത്തേക്കുള്ള ഒരു പ്രചോദനാത്മക യാത്രയായി ‘അക്ഷരയാത്ര’ മാറിയതായി പങ്കെടുത്തവർ അഭിപ്രായപ്പെട്ടു.
