വൈദ്യുതി കണക്ഷന്‍ നല്‍കിയില്ല: യുവ വ്യവസായി മരത്തിന് മുകളില്‍ കയറി ആത്മഹത്യ ഭീഷണി മുഴക്കി
കൊച്ചി: വൈദ്യുതി കണക്ഷന്‍ നല്‍കാത്തതില്‍ പ്രതിഷേധിച്ച്‌ യുവ വ്യവസായി മരത്തിന് മുകളില്‍ കയറി ആത്മഹത്യ ഭീഷണി മുഴക്കി. അങ്കമാലിയിലെ ന്യൂ ഇയര്‍ ചിട്ടിക്കമ്പനി ഉടമ എം.എം. പ്രസാദാണ് മരത്തിന് മുകളില്‍ കയറി ആത്മഹത്യ ഭീഷണി മുഴക്കിയത്. സ്ഥാപനത്തിലേക്ക് വൈദ്യുതി കണക്ഷന്‍ നല്‍കിയില്ലെന്ന് ആരോപിച്ചായിരുന്നു ഭീക്ഷണി. അങ്കമാലിയിലെ കറുകുറ്റി കെഎസ്‌ഇബി ഓഫീസിന് മുമ്പിലുള്ള മരത്തില്‍ കയറിയാണ് ഇയാള്‍ ഭീഷണി മുഴക്കിയത്.
ഇദ്ദേഹത്തെ അനുനയിപ്പിക്കാന്‍ ശ്രമങ്ങള്‍ തുടര്‍ന്നുകൊണ്ടിരിക്കുകയാണ്. എന്നാല്‍ ജില്ലാ കലക്ടര്‍ എത്തി അനുകൂല തീരുമാനം ഉണ്ടാക്കാതെ പിന്തിരിയില്ലെന്നാണ് പ്രസാദിന്റെ വാദം. അതേസമയം, ആത്മഹത്യ ഭീഷണി സമ്മര്‍ദ്ദതന്ത്രമാണെന്ന് കെഎസ്‌ഇബി പ്രതികരിച്ചു. പ്രസാദിന്റെ സ്ഥാപനത്തിന്റെ പ്ലാനില്‍ പിഴവ് കണ്ടെത്തിയതിനാലാണ് വൈദ്യുതി കണക്ഷന്‍ നല്‍കാത്തത് എന്നാണ് കെഎസ്‌ഇബിയുടെ വിശദീകരണം. പ്രസാദിനെ താഴെയിറക്കാന്‍ പോലീസും ഫയര്‍ഫോഴ്‌സും ശ്രമം നടത്തുന്നുണ്ട്.
