മരുന്ന് സംഭരണശാലയിലേക്ക് കണ്ടെയ്നര്‍ ട്രക്ക് ഇടിച്ചു കയറി
നടുവണ്ണൂര്‍: മരുന്ന് സംഭരണശാലയിലേക്ക് കണ്ടെയ്നര്‍ ട്രക്ക് ഇടിച്ചു കയറി. 60 ലക്ഷം രൂപയുടെ നഷ്ടം. കരുവണ്ണൂരില്‍ പ്രവര്‍ത്തിക്കുന്ന മരുന്ന് സംഭരണശാലയിലേക്ക് മരുന്നുമായി വന്ന കണ്ടെയ്നര്‍ ട്രക്കാണ് സംഭരണ ശാലയുടെ കനോപ്പി ഏരിയയിലേക്ക് ഇടിച്ച്‌ കയറിയത്. ഇവിടെ പാര്‍ക്ക് ചെയ്തിരുന്ന രണ്ട് എന്‍ഫീല്‍ഡ് ബുള്ളറ്റുകളും, ഓക്സിജന്‍ കോണ്‍സന്‍േട്രറ്റര്‍ മെഷീനുകള്‍, ഫ്രിഡ്ജുകള്‍, പെല്ലറ്റുകള്‍ എന്നിവ തകര്‍ന്നു. ഓഫിസ് ജനലും ഗ്ലാസും തകര്‍ന്നു.
അതി സുരക്ഷാ പ്രാധാന്യമുള്ള ജില്ല മരുന്ന് സംഭരണശാലയില്‍ അവധി ദിവസമായ ചൊവ്വാഴ്ച്ച ഉച്ചക്ക് 12 മണിക്കാണ് സംഭവം. ഹിന്ദുസ്ഥാന്‍ ലബോറട്ടറീസ് ലിമിറ്റഡ് കമ്ബനിയുടെ മരുന്നുകളുമായി വന്ന കണ്ടെയ്നര്‍ ട്രക്കാണ് അപകടം വരുത്തിയത്. ഡ്രൈവറുടെ അശ്രദ്ധയും ജാഗ്രതക്കുറവുമാണ് അപകടത്തിന് കാരണമെന്ന് ദൃക്സാക്ഷികള്‍ പറയുന്നു. വാഹനത്തിൻ്റെ ബ്രേക്ക് പോയതാണ് അപകടത്തിന് കാരണമെന്ന് ഡ്രൈവര്‍ പൊലീസിന് മൊഴി നല്‍കി.
വാഹനങ്ങള്‍ക്കും ഉപകരണങ്ങള്‍ക്കും ഓഫീസിനും ഉള്‍പ്പെടെ ഏകദേശം 60 ലക്ഷം രൂപയുടെ നഷ്ടമുണ്ടായതായി കണക്കാക്കുന്നു. മരുന്ന് സംഭരണശാല നിര്‍വഹണാധികാരി പേരാമ്ബ്ര പൊലീസില്‍ പരാതി നല്‍കി. ഗ്രാമ പഞ്ചായത്ത് പ്രസിഡന്‍റ് ടി.പി. ദാമോദരന്‍ മാസ്റ്റര്‍, ഗ്രാമ പഞ്ചായത്തംഗങ്ങള്‍ എന്നിവര്‍ സ്ഥലം സന്ദര്‍ശിച്ചു.
