കോടതി വിധി എതിരായാല് പൊതുപ്രവര്ത്തനം അവസാനിപ്പിക്കും: പി.എസ്. ശ്രീധരന്പിള്ള
കോഴിക്കോട്: തനിക്കെതിരായ കേസിന് പിന്നില് വന് ഗൂഢാലോചന നടന്നിട്ടുണ്ടെന്ന് ബിജെപി സംസ്ഥാന പ്രസിഡന്റ് പി.എസ്. ശ്രീധരന്പിള്ള. ഉന്നത സിപിഎം നേതാക്കളും, തെരഞ്ഞെടുപ്പ് ഉദ്യോഗസ്ഥനും ഇതിനു പിന്നിലുണ്ട്. കേസിനെ നിയമപരമായും രാഷ്ട്രീയപരമായും നേരിടുമെന്നും അദ്ദേഹം ആരോപിച്ചു.
ആറ്റിങ്ങലില് നടത്തിയ മുസ്ലിംവിരുദ്ധ പ്രസംഗവുമായി ബന്ധപ്പെട്ടാണു ശ്രീധരന്പിള്ളയ്ക്കെതിരേ കേസെടുത്തത്. എന്നാല് പ്രസംഗത്തില് മതസ്പര്ധ വളര്ത്തുന്ന ഒരു വാക്ക് പോലും ഇല്ലെന്ന് ബിജെപി അധ്യക്ഷന് പറഞ്ഞു. ഒരു മതത്തെ കുറിച്ചും പരാമര്ശമില്ല. ദൈവത്തിന്റെ മുന്നിലും കോടതിക്ക് മുന്നിലും താന് കുറ്റക്കാരനാവില്ലെന്നും അദ്ദേഹം പറഞ്ഞു.
കേസില് കോടതി വിധി എതിരായാല് പൊതുപ്രവര്ത്തനം അവസാനിപ്പിക്കും. എന്നാല് ആരോപണം തെറ്റെന്ന് തെളിഞ്ഞാല് പരാതി നല്കിയ വി.ശിവന്കുട്ടി പൊതുപ്രവര്ത്തനം അവസാനിപ്പിക്കുമോയെന്നും ശ്രീധരന്പിള്ള ചോദിച്ചു.