കൂറ്റൻ അണലി പിടിയിലായി
വടകര: മണിയൂർ മുടപ്പിലാവിൽ കൂറ്റൻ അണലി പിടിയിലായി. രാമത്ത് മീത്തൽ ആമിനയുടെ വീട്ടുവളപ്പിൽ നിന്നാണ് ഒന്നര മീറ്റർ നീളമുള്ള അണലിയെ പിടികൂടിയത്. അയൽവാസി ഇബ്രാഹിമിന്റെ ഭാര്യ വിറകെടുക്കാൻ പറമ്പിൽ ഇറങ്ങിയപ്പോഴാണ് അണലിയെ കണ്ടത്. ഓടിക്കൂടിയ വീട്ടുകാരും പരസരവാസികളും തിരഞ്ഞെങ്കിലും പാമ്പിനെ കണ്ടില്ല.
കഴിഞ്ഞ ദിവസം രാവിലെ ഓലക്കുള്ളിൽ നിന്നു വീണ്ടും പാമ്പ് പുറത്തുവന്നു. നാട്ടുകാരുടെ രണ്ടാം ശ്രമവും വിജയിക്കാതായതോടെ പെരുവണ്ണാമൂഴി ഫോറസ്റ്റ് ഓഫീസിൽ നിന്ന് പാമ്പുപിടുത്തക്കാരൻ സുരേന്ദ്രനെ വിളിച്ചു വരുത്തുകയായിരുന്നു. പറമ്പിൽ നിന്നു തന്നെ സുരേന്ദ്രൻ അണലിയെ പിടികൂടി വലിയ കുപ്പിയിലടച്ച് പെരുവണ്ണാമൂഴിക്കു കൊണ്ടുപോയി. ഉഗ്രവിഷമുള്ള അണലിയുടെ കടിയേറ്റാൽ രക്ഷപ്പെടുക പ്രയാസമാണ്.