വായുമലിനീകരണം പ്രമേഹത്തിനും ഹൃദ്രോഗത്തിനും കാരണമാകുമോ? അറിയാം

.

വായുമലിനീകരണം ആരോഗ്യത്തെ ബാധിക്കുക എന്നാല്‍ ശ്വാസംമുട്ടല്‍, ചുമ, അലര്‍ജി തുടങ്ങിയ പ്രശ്‌നങ്ങള്‍ ഉണ്ടാവുക എന്നാണ് പൊതുവേ എല്ലാവര്‍ക്കും അറിയാവുന്ന കാര്യം. എന്നാല്‍ മലിനമായ വായു ശ്വസിക്കുന്നത് ശ്വാസകോശത്തിനപ്പുറം ശരീരത്തിലെ മറ്റ് അവയവങ്ങളെയും ബാധിച്ചേക്കാം.

രക്തത്തിലെ പഞ്ചസാരയുടെ നിയന്ത്രണം തകരാറിലാക്കാനും ഹൃദ്രോഗസാധ്യത വര്‍ധിപ്പിക്കാനും വായുമലിനീകരണത്തിന് പങ്കുണ്ടെന്നാണ് ഗവേഷണങ്ങള്‍ വ്യക്തമാക്കുന്നത്. വായുവിലുള്ള അതിസൂക്ഷ്മ കണങ്ങളാണ് ഇതില്‍ പ്രധാനപ്പെട്ട ഒരു ഘടകം. പിഎം 2.5 (PM2.5) എന്നറിയപ്പെടുന്ന ഈ കണങ്ങള്‍ക്ക് ശ്വാസകോശത്തിന്റെ ആഴത്തിലുള്ള ഭാഗങ്ങളിലേക്ക് കടന്നുചെല്ലാന്‍ കഴിയും.

ഇവ ശരീരത്തില്‍ നീര്‍വീക്കത്തിനും കോശങ്ങള്‍ക്ക് കേടുപാടുകള്‍ വരുത്തുന്ന ഓക്‌സിഡേറ്റീവ് സമ്മര്‍ദത്തിനും കാരണമായേക്കാം. ഇത് ഇന്‍സുലിന്‍ ഹോര്‍മോണിന്റെ പ്രവര്‍ത്തനത്തെ ബാധിക്കാം. രക്തത്തിലെ പഞ്ചസാര നിയന്ത്രിക്കാന്‍ ഇന്‍സുലിന്‍ ആവശ്യമാണ്. ശരീരത്തിലെ കോശങ്ങള്‍ ഇന്‍സുലിനോട് വേണ്ടവിധം പ്രതികരിക്കാതാകുന്ന അവസ്ഥയാണ് ഇന്‍സുലിന്‍ പ്രതിരോധം. ഇത് ടൈപ്പ് 2 പ്രമേഹത്തിന്റെ പ്രധാന ഘടകങ്ങളിലൊന്നാണ്.

പ്രമേഹമുള്ളവരില്‍ ഹൃദയാഘാതം, പക്ഷാഘാതം തുടങ്ങിയ ഹൃദയ-രക്തക്കുഴല്‍ രോഗങ്ങള്‍ക്കുള്ള സാധ്യത കൂടുതലാണ്. വായുമലിനീകരണം രക്തക്കുഴലുകളുടെ പ്രവര്‍ത്തനത്തെ ബാധിക്കുകയും അവയില്‍ നീര്‍വീക്കവും കേടുപാടുകളും ഉണ്ടാക്കുകയും ചെയ്യുന്നു. അതുകൊണ്ട് പ്രമേഹവും വായുമലിനീകരണവും ഒരുമിച്ചുണ്ടാകുമ്പോള്‍ ഹൃദയാരോഗ്യത്തിനുള്ള അപകടസാധ്യത വര്‍ധിക്കാം. ഇതിനകം പ്രമേഹമോ ഹൃദ്രോഗമോ ഉള്ളവര്‍ മലിനമായ വായു ശ്വസിക്കുന്നത് പരമാവധി ഒഴിവാക്കുന്നത് നല്ലതാണ്.

• വായുമലിനീകരണം കൂടുതലുള്ള സമയങ്ങളില്‍ പുറത്തിറങ്ങുന്നത് പരമാവധി കുറയ്ക്കുക.
• വ്യായാമത്തിനായി സ്ഥലം തിരഞ്ഞെടുക്കുമ്പോള്‍ വായുവിന്റെ ഗുണനിലവാരം കൂടി പരിഗണിക്കുക.
• മലിനീകരണം കൂടുതലുള്ള സാഹചര്യങ്ങളില്‍ അനുയോജ്യമായ എന്‍ 95 മാസ്‌ക് ഉപയോഗിക്കുക.
• പുകവലി, മാലിന്യം കത്തിക്കല്‍ തുടങ്ങിയവ ഒഴിവാക്കുക.
• ആരോഗ്യകരമായ ഭക്ഷണശീലം പിന്തുടരുകയും ശരീരത്തിന് അനുയോജ്യമായ വ്യായാമം ചെയ്യുകയും ചെയ്യുക.
• പ്രമേഹസാധ്യതയുള്ളവര്‍ രക്തത്തിലെ പഞ്ചസാരയും മറ്റ് ആരോഗ്യസൂചകങ്ങളും ഡോക്ടറുടെ നിര്‍ദേശപ്രകാരം പരിശോധിക്കുക.