മലപ്പുറം താനൂരില് ജോലിക്കിടെ യുവാവിന് സൂര്യാതപമേറ്റു
.
മലപ്പുറം: മലപ്പുറം താനൂരില് ജോലിക്കിടെ യുവാവിന് സൂര്യാതപമേറ്റു. താനൂര്- മഠത്തി റോഡില് താമസിക്കുന്ന യുവാവിനാണ് സൂര്യാതപമേറ്റത്. അട്ടത്തോടിന് സമീപം ജോലിയെടുക്കുന്നതിനിടെ കൈയിലാണ് സൂര്യാതപമേറ്റത്. ഉടനെ കുന്നുംപ്പുറം ഹെല്ത്ത് സെന്ററില് ചികിത്സ നേടി. മലപ്പുറത്ത് ഇതിനകം നാല് പേര്ക്ക് സൂര്യാതപം ഏറ്റതായാണ് റിപ്പോര്ട്ട്. മലപ്പുറം ചെമ്മാട് വാഹനം കാത്തു നിൽക്കുന്നതിനിടെ രണ്ടാം ക്ലാസുകാരന് സൂര്യാതപമേറ്റിരുന്നു.
തിരൂരങ്ങാടി കെ സി റോഡ് സ്വദേശി അസീസ് – ഫരീദ ദമ്പതികളുടെ മകൻ അഫ്നാൻ ആണ് പരിക്കേറ്റത്. വലതു കയ്യിലായിരുന്നു പൊള്ളലേറ്റത്. തിരൂരങ്ങാടി താലൂക്ക് ആശുപത്രിയിൽ ചികിത്സ നൽകി. നിലവില് തൃശൂര്, പാലക്കാട് ജില്ലകളിലാണ് ഉഷ്ണതരംഗ സാധ്യതാ മുന്നറിയിപ്പുള്ളത്. മറ്റ് ജില്ലകളിലും സാധാരണയെക്കാള് 4 മുതല് 5 ഡിഗ്രി സെല്ഷ്യസ് വരെ താപനില ഉയരുന്ന സാഹചര്യം തുടരുകയാണ്. സംസ്ഥാനമാകെ അതീവ ജാഗ്രത തുടരണമെന്നും നിര്ദ്ദേശമുണ്ട്.
