ഗൃഹനാഥന് ചവിട്ടേറ്റ് മരിച്ചു, വളര്ത്തുമകന് അറസ്റ്റില്
ഏറ്റുമാനൂര്: ചവിട്ടേറ്റ് ഗൃഹനാഥന് കൊല്ലപ്പെട്ടു. ഏറ്റുമാനൂര് നരിക്കുഴിയില് മണി രാഘവനാണ്(70) കൊല്ലപ്പെട്ടത്. ഇയാളുടെ വളര്ത്തുമകന് മനു(34)വിനെ ഏറ്റുമാനൂര് പോലീസ് അറസ്റ്റ് ചെയ്തു. മദ്യലഹരിയിലുണ്ടായ വഴക്കാണ് കൊലപാതകത്തിലേക്ക് നയിച്ചതെന്ന് പോലീസ് പറഞ്ഞു. ഞായറാഴ്ച രാത്രിയിലാണ് സംഭവം. ദിവസവും മദ്യപിച്ച് എത്തുന്ന മണി രാഘവന് വീട്ടില് സ്ഥിരമായി വഴക്കുണ്ടാക്കുക പതിവായിരുന്നു. രണ്ടു മാസം മുന്പായിരുന്നു മനുവിന്റെ വിവാഹം. ഞായറാഴ്ച രാത്രി വഴക്ക് മൂത്തതിനെ തുടര്ന്ന് സഹികെട്ട മനു മണിരാഘവനെ ചവിട്ടി വീഴ്ത്തി. ചവിട്ടേറ്റ് വീടിന്റെ തിണ്ണയില് വീണ മണി രാഘവന് ബോധരഹിതനായതോടെ അകത്തു കട്ടിലില് കയറ്റി കിടത്തി. രാവിലെ പരിശോധിച്ചപ്പോള് മരിച്ചതായി കണ്ടെത്തി. ഇതോടെ മനു സ്വഭാവിക മരണം എന്ന രീതിയില് പോലീസിനെയും നാട്ടുകാരെയും വിളിച്ചുവരുത്തി. എന്നാല് പോലീസിന്റെ പരിശോധനയില് അസ്വഭാവികത തോന്നിയതോടെ ഇന്ക്വസ്റ്റ് തയാറാക്കി മ്യതദേഹം മെഡിക്കല് കോളജില് പോസ്റ്റ്മോര്ട്ടം നടത്തി.
പോസ്റ്റ്മോര്ട്ടത്തില് മണി രാഘവന്റെ രണ്ട് വാരിയെല്ല് ഒടിഞ്ഞതായി കണ്ടെത്തി. ക്രൂരമായ മര്ദനമേറ്റാണ് മരണം സംഭവിച്ചതെന്ന് ഇതോടെ വ്യക്തമായി. മനുവിനെ പോലീസ് കസ്റ്റഡിയില് എടുത്ത് ചോദ്യം ചെയ്തതോടെ കൊലപാതകമെന്ന് സമ്മതിച്ചു. മദ്യലഹരിയിലുണ്ടായ വഴക്കാണ് കൊലപാതകത്തിലേക്ക് നയിച്ചതെന്ന് പോലീസ് പറഞ്ഞു.
മനുവിന്റെ അറസ്റ്റ് രേഖപ്പെടുത്തി. ഇയാളെ ഇന്നു കോടതിയില് ഹാജരാക്കും. മനുവിന് ആറു വയസുളളപ്പോഴാണ് അമ്മയോടൊപ്പം മണിരാഘവന് താമസം തുടങ്ങിയത്. അടിച്ചിറയില് പുറന്പോക്കിലായിരുന്നു താമസം.
ഏതാനും വര്ഷം മുന്പ് മനുവിന്റെ അമ്മ അപകടത്തില് മരിച്ചു. ഇന്ഷ്വറന്സ് ക്ലെയിം കിട്ടിയ പണത്തിന് ഏറ്റുമാനൂരില് വീട് വാങ്ങി ഇരുവരും താമസിച്ചു വരികയായിരുന്നു. സ്ഥിരമായി ബഹളമുണ്ടാക്കി കേസില്പ്പെടുന്ന മണി രാഘവനെ സ്റ്റേഷനില് നിന്ന് കൂട്ടിക്കൊണ്ടുവരുന്നത് മനുവായിരുന്നു. പെറ്റിക്കേസില്പ്പെടുന്ന മണി രാഘവന് കോടതിയില് പണം അടയ്ക്കുന്നതു പോലും മനുവായിരുന്നുവെന്ന് പോലീസ് പറയുന്നു.