അന്പലപ്പുഴ ശ്രീകൃഷ്ണസ്വാമി ക്ഷേത്രത്തിൽ തിരുവാഭരണത്തിലെ പതക്കം നഷ്ടപ്പെട്ടു
അന്പലപ്പുഴ: അന്പലപ്പുഴ ശ്രീകൃഷ്ണസ്വാമി ക്ഷേത്രത്തിൽ തിരുവാഭരണത്തിലെ പതക്കം നഷ്ടപ്പെട്ടു. ഇന്ന് ദേവസ്വം ബോർഡ് കമ്മീഷണർ ക്ഷേത്രത്തിൽ പരിശോധന നടത്തി ഇതു സ്ഥിരീകരിച്ചു. വിഷു ദിനത്തിലാണ് ഇതിന്റെ ചുമതലക്കാരനായ അഡ്മിനിസ്ട്രേറ്റീവ് ഓഫീസർ ക്ഷേത്രം മേൽശാന്തിയെ പതക്കം ഏൽപ്പിച്ചത്.
വിഷുവിനു തിരുവാഭരണത്തിൽ ചാർത്താനായി നവരത്നങ്ങൾ പതിപ്പിച്ച മുഖം, മാറ്, മാല എന്നിവ മേൽശാന്തിയെ ഏൽപ്പിച്ചിരുന്നു. ചടങ്ങിനു ശേഷം തിരുവാഭരണം തിരികെ അഡ്മിനിസ്ട്രേറ്റീവ് ഓഫീസറെ ഏൽപ്പിച്ചെങ്കിലും ഇതിൽ പതക്കങ്ങൾ ഇല്ലായിരുന്നു എന്ന് അഡ്മിനിസ്ട്രേറ്റീവ് ഓഫീസർ പറഞ്ഞു. രണ്ടു ദിവസം മുന്പാണു പതക്കം നഷ്ടപ്പെട്ട വിവരം അറിയുന്നത്.
തുടർന്നു ക്ഷേത്രത്തിൽ വ്യാപകമായ തെരച്ചിൽ നടത്തിയെങ്കിലും ഇവ കണ്ടെത്താൻ കഴിഞ്ഞില്ല. തുടർന്ന് ബുധനാഴ്ച ദേവസ്വം ബോർഡ് കമ്മീഷണർക്കു മുൻ ക്ഷേത്ര ഉപദേശക സമിതി സെക്രട്ടറി സുബാഷ് പരാതി നൽകുകയായിരുന്നു. പരാതിയെ തുടർന്നു ദേവസ്വം ബോർഡ് വിജിലൻസ് പരിശോധന നടത്തിയിരുന്നു.