മാഹിയിൽ നിന്നും അനധികൃതമായി കടത്തുകയായിരുന്ന വിദേശ മദ്യവുമായി രണ്ടുപേർ പിടിയിൽ
മാഹിയിൽ നിന്നും അനധികൃതമായി കടത്തുകയായിരുന്ന വിദേശ മദ്യവുമായി രണ്ടുപേർ പിടിയിൽ. ഏഴര ലിറ്റർ മദ്യവുമായി കോഴിക്കോട് കുന്നമംഗലം സ്വദേശി ഇടവന പുറായിൽ വീട്ടിൽ വിജീഷി (47) നെയും 34 ലിറ്റർ മദ്യവുമായി കോഴിക്കോട് ചെറുവണ്ണൂർ സ്വദേശിയായ വാപ്പാഞ്ചേരി വീട്ടിൽ നിഖിലിനെ (30) യുമാണ് വടകര എക്സൈസ് സർക്കിൾ സംഘം അറസ്റ്റ് ചെയ്തത്.
കോഴിക്കോട് ജോയിൻ്റ് എക്സൈസ് കമ്മീഷണർ ജി. പ്രദീപിന് ലഭിച്ച രഹസ്യ വിവരത്തിൻ്റെ അടിസ്ഥാനത്തിൽ വടകര – തലശ്ശേരി ദേശീയ പാതയിൽ ഇന്ന് പുലർച്ചെ 1.30ന് നടത്തിയ വാഹന പരിശോധനയിലാണ് പ്രതി പിടിയിലായത്. എക്സൈസ് പ്രിവൻ്റിവ് ഓഫീസർ തറോൽ രാമചന്ദ്രൻ്റെ നേതൃത്വത്തിലുള്ള സംഘമാണ് നിഖിലിനെ അറസ്റ്റ് ചെയ്തത്.
കെ.എൽ 85 – 8845 എന്ന നമ്പരിലുള്ള സ്കൂട്ടർ തടഞ്ഞ് നിർത്തി പരിശോധിച്ചപ്പോഴാണ് വിദേശ മദ്യം കണ്ടെത്തിയത്. ബാഗിൽ സൂക്ഷിച്ച 500 എം.എല്ലിൻ്റെ 68 ബോട്ടിലുകളാണ് പിടികൂടിയത്. കോഴിക്കോട് ഭാഗത്തേക്ക് കടത്തുകയായിരുന്നു മദ്യം. മദ്യം കടത്താനുപയോഗിച്ച സ്ക്കൂട്ടറും അധികൃതർ കസ്റ്റഡിയിലെടുത്തു.
