”അരങ്ങ് 2023 ഒരുമയുടെ പലമ ” കുടുംബശ്രീ ജില്ലാ കലോത്സവം മെയ് 23, 24 കൊയിലാണ്ടി
” അരങ്ങ് 2023 ഒരുമയുടെ പലമ ” കുടുംബശ്രീ ജില്ലാ കലോത്സവം മെയ് 23, 24 കൊയിലാണ്ടി.. ലോകത്തിന് തന്നെ മാതൃകയായ കുടുംബശ്രീ പ്രസ്ഥാനം ഇരുപത്തിയഞ്ച് വര്‍ഷം പൂര്‍ത്തീകരിച്ചിരിക്കുന്നു. 2023 മെയ് 23 ന് രാവിലെ കൊയിലാണ്ടി എം എല്‍ എ കാനത്തില്‍ ജമീല അധ്യക്ഷത വഹിക്കുന്ന ചടങ്ങില്‍ തുറമുഖം മ്യൂസിയം പുരാവസ്തു വകുപ്പ് മന്ത്രി അഹമ്മദ് ദേവര്‍ കോവില്‍ അരങ്ങ് 2023 ന്‍റെ ഉദ്ഘാടനം നിര്‍വഹിക്കും. പുതിയ കാലഘട്ടത്തിനനുസൃതമായും അയല്‍ക്കൂട്ടാംഗങ്ങളുടെ ആവശ്യങ്ങള്‍ക്കനുസരിച്ചും നൂതന പ്രവര്‍ത്തന രീതി ശാസ്ത്രം രൂപകല്‍പന ചെയ്യുന്ന പ്രക്രിയയിലാണ് കുടുംബശ്രീ. പുതിയ കാലഘട്ടത്തില്‍ ഓരോ വ്യക്തിയുടെയും മാനസികാരോഗ്യം സൃഷ്ടിക്കുകയെന്നത് പ്രധാനപ്പെട്ട ഒന്നാണ്. ഈ സാഹചര്യത്തിലാണ് കുടുംബശ്രീ അംഗങ്ങളുടെ മാനസികാരോഗ്യം ഉറപ്പ് വരുത്തുന്നതിനും അവരുടെ സര്‍ഗാത്മക കഴിവുകളെ പരിപോഷിപ്പിക്കുന്നതിനും വേണ്ടി അരങ്ങ് 2023 ഒരുമയുടെ പലമ എന്ന പേരില്‍ വിപുലമായ കലാമത്സരങ്ങള്‍ സംഘടിപ്പിക്കുന്നത്.
കോവിഡ് സാഹചര്യത്തില്‍ കഴിഞ്ഞ 2 വര്‍ഷം അരങ്ങ് കലാമത്സരങ്ങള്‍ സംഘടിപ്പിക്കുന്നതിന് കഴിഞ്ഞിരുന്നില്ല. എന്നാല്‍ ഈ വര്‍ഷം എ ഡി എസ് തലം മുതല്‍ താലൂക്ക് തലം വരെ വിപുലമായ രീതിയില്‍ വന്‍ ജന പങ്കാളിത്തത്തോടെ അരങ്ങ് കലാമത്സരങ്ങള്‍ ജില്ലയില്‍ സംഘടിപ്പിച്ചത് സംസ്ഥാന കുടുംബശ്രീ കലോത്സവത്തിന് മുന്നോടിയായി കുടുംബശ്രീ ജില്ലാതല അരങ്ങ് കലോത്സവം 2023 മെയ് 23, 24 തിയ്യതികളില്‍ കൊയിലാണ്ടി ടൗണ്‍ ഹാളില്‍ വച്ച് സംഘടിപ്പിക്കുകയാണ്. ഓഫ് സ്റ്റേജ് മത്സരങ്ങള്‍ മെയ് 20 ന് കൊയിലാണ്ടി ഗവ.വൊക്കേഷണൽ ഹയർ സെക്കൻഡറി സ്കൂളില്‍ വച്ച് നടത്തപ്പെടും.
Advertisements
ജില്ലയിലെ നാല് താലൂക്ക് മത്സരങ്ങളില്‍ വിജയിച്ച് ഒന്നാം സ്ഥാനം നേടിയവരാണ് ജില്ലാമത്സരങ്ങളില്‍ പങ്കെടുക്കുന്നത്. വിവിധ കുടുംബശ്രീ സി ഡി എസുകളില്‍ നിന്നായി 500 ഓളം കലാകാരികള്‍ രണ്ട് ദിവസം നീണ്ട് നില്‍ക്കുന്ന മത്സരങ്ങളില്‍ പങ്കെടുക്കും കലോത്സവത്തിന്‍റെ വിജയകരമായ നടത്തിപ്പിനായി 201 അംഗ സംഘാടക സമിതി പ്രവര്‍ത്തിച്ചു വരുന്നുണ്ട്. മെയ് 22 ന് വൈകുന്നേരം 4 മണിക്ക് ജനപ്രതിനിധികളും കുടുംബശ്രീ അംഗങ്ങളും പങ്കെടുക്കുന്ന വിളംബര ജാഥ സംഘടിപ്പിക്കുന്നുണ്ട്. കൂടാതെ കലവറ നിറയ്ക്കല്‍ എന്നി പ്രവര്‍ത്തനങ്ങളും ഇതിന്‍റെ ഭാഗമായി സംഘടിപ്പിക്കുന്നുണ്ട്.
നഗരസഭ ചെയര്‍പേഴ്സണ്‍ സുധ കിഴക്കേപ്പാട്ട്, സംഘാടക സമിതി സാമ്പത്തിക ചെയര്‍മാന്‍ ആയ കൊയിലാണ്ടി നഗരസഭ വൈസ് ചെയര്‍മാന്‍ അഡ്വ കെ സത്യന്‍, സംഘടക സമിതി പ്രോഗ്രാം കമ്മിറ്റി ചെയർമാൻ നഗരസഭാ ക്ഷേമകാര്യ സ്റ്റാന്‍റിംഗ് കമ്മിറ്റി ചെയര്‍മാന്‍ ഷിജു മാസ്റ്റര്‍, സംഘടക സമിതി മീഡിയ ചെയര്‍പേഴ്സണ്‍ ആയ കൊയിലാണ്ടി നഗരസഭ കൗൺസിലര്‍ രത്നവല്ലി ടീച്ചര്‍, സംഘടക സമിതി മീഡിയ കമ്മിറ്റി അംഗവും കൊയിലാണ്ടി നഗരസഭ കൗൺസിലര്‍ ആയ എന്‍ എസ് വിഷ്ണു, കുടുംബശ്രീ ജില്ലാ പ്രോഗ്രാം മാനേജര്‍ ബിജേഷ് ടി ടി, കുടുംബശ്രീ സി ഡി എസ് ചെയര്‍പേഴ്സണ്‍ വിപിന കെ കെ, സംഘടക സമിതി മീഡിയ കമ്മിറ്റി ജോയിന്‍റ് കണ്‍വീനര്‍ അശ്വിന്‍ പി എം എന്നിവര്‍ പങ്കെടുത്തു.
