ശബരിമലയെ സുവര്‍ണാവസരമാക്കുന്നവര്‍ രാജ്യത്തിന‌് ആപത്ത‌്: ദീപിക രജാവത്ത‌്
തിരുവനന്തപുരം : ശബരിമല വിവാദത്തെപ്പോലും രാഷ്ട്രീയനേട്ടത്തിനുള്ള സുവര്‍ണാവസരമാക്കി ദുരുപയോഗം ചെയ്യുന്നവര്‍ രാജ്യത്തിന്റെ ഭാവി അപകടത്തിലാക്കുന്നെന്ന‌് അഭിഭാഷകയും സാമൂഹ്യപ്രവര്‍ത്തകയുമായ ദീപിക സിങ‌് രജാവത്ത‌് പറഞ്ഞു. രാജ്യത്തിന്റെ അഖണ്ഡതയും മതനിരപേക്ഷതയും സംരക്ഷിക്കുംവിധം ശക്തരായി യുവതലമുറയെ വാര്‍ത്തേടുക്കണം. വിദ്യാര്‍ഥികള്‍ അനീതിക്കെതിരെ പ്രതികരിക്കാനും സമൂഹത്തിനായി പോരാടാനും തയ്യാറാകണമെന്നും ദീപിക പറഞ്ഞു. കേരള മീഡിയ അക്കാദമി ദേശിയ പത്രദിന വാരാചരണത്തിന്റെ സമാപനത്തില്‍ പ്രസ് ക്ലബ്ബുമായി സഹകരിച്ച്‌ സംഘടിപ്പിച്ച മാധ്യമസ്വാതന്ത്ര്യ സംഗമം ഉദ്ഘാടനം ചെയ്യുകയായിരുന്നു അവര്‍.
വ്യക്തികള്‍ക്കെതിരെ, പ്രത്യേകിച്ച‌് സ്ത്രീകള്‍ക്കെതിരെ വാസ്തവവിരുദ്ധമായ വാര്‍ത്തകള്‍ പടയ്ക്കുന്ന മാധ്യമങ്ങള്‍ അവരുടെ ജീവന്‍ അപകടത്തിലാക്കുന്നു. കഠ‌്‌വ കേസില്‍നിന്ന‌് മാറ്റിയതുമുതല്‍ സാമൂഹ്യമാധ്യമങ്ങളിലും തനിക്കെതിരെ വ്യാപകമായ പ്രചാരണമാണ‌് നടക്കുന്നത‌്. പണത്തിനായി കേസ‌് അട്ടിമറിച്ചെന്ന ആരോപണംവരെയുണ്ടായി. ഇതിനായി സ്വകാര്യ ഫോട്ടോകളും ഉപയോഗിച്ചു. മുഖ്യധാര, നവമാധ്യമങ്ങളിലൂടെ സമൂഹത്തിന്റെ മതനിരപേക്ഷ ചട്ടക്കൂട്‌ തകര്‍ക്കുന്നവരെ ഒറ്റപ്പെടുത്തണം.
അനീതിക്കെതിരെ പൊരുതുന്നവരെ കടന്നാക്രമിക്കുന്ന സാമൂഹ്യ മനഃസ്ഥിതി ദുഃഖമുളവാക്കുന്നു. അതിക്രൂരപീഡനത്തിന‌് ഇരയായി കൊല്ലപ്പെട്ട എട്ടുവയസ്സുകാരിയുടെ കുടുംബത്തിന‌് നീതി ലഭിക്കാന്‍ ലാഭേച്ഛയില്ലാതെ പ്രവര്‍ത്തിച്ചു. സ്വഭാവഹത്യയും നിരന്തര ഭീഷണിയുമായിരുന്നു ഫലം. അതിഭീകരമായ സമ്മര്‍ദം തന്നെ ആത്മഹത്യയുടെ മുനമ്ബില്‍ എത്തിച്ചു. എന്നാല്‍, ഭീഷണികള്‍ക്ക‌് വഴങ്ങി നിശ്ശബ്ദയാകില്ല. താനടക്കമുള്ളവര്‍ തളര്‍ന്നുവീണാലും അനീതിക്കെതിരെ പ്രതിരോധം തീര്‍ക്കാന്‍ ഇളംതലമുറയ്ക്ക‌് കഴിയണം.
ശബരിമലയില്‍ വനിതാ മാധ്യമപ്രവര്‍ത്തകര്‍ക്കുനേരെയുണ്ടായ അതിക്രമത്തെയും ദീപിക അപലപിച്ചു. രാജ്യത്ത‌് സ്ത്രീകള്‍ സുരക്ഷിതരല്ല. പ്രതികരിക്കുന്ന വനിതകള്‍ ആക്രമിക്കപ്പെടുന്ന സംസ്കാരം ഏതുവിധേനയും അവസാനിപ്പിക്കണം. ഇതിനായി ഓരോരുത്തരും മുന്‍കൈ എടുക്കണം. ആക്രമിക്കപ്പെട്ട വനിതാ മാധ്യമപ്രവര്‍ത്തകര്‍ക്ക‌് കരുത്തേകാന്‍ രാജ്യവ്യാപകമായി കരിദിനം ആചരിക്കണമെന്നും അവര്‍ പറഞ്ഞു. മീഡിയ അക്കാദമി ചെയര്‍മാന്‍ ആര്‍ എസ് ബാബു അധ്യക്ഷനായി. ഡോ. സെബാസ്റ്റ്യന്‍ പോള്‍ മുഖ്യപ്രഭാഷണം നടത്തി. മാധ്യമപ്രവര്‍ത്തകരായ സരിത വര്‍മ, കമാല്‍ വരദൂര്‍, സരിത എസ് ബാലന്‍, സ്നേഹ മേരി കോശി എന്നിവര്‍ സംസാരിച്ചു.
