പഞ്ചായത്ത് ഓഫീസില്‍ തീയിടാന്‍ ശ്രമം, രണ്ടു പേര്‍ പിടിയില്‍
തിരുവനന്തപുരം: മാറനല്ലൂര്‍ ഗ്രാമപഞ്ചായത്ത് സെക്രട്ടറിയുടെ ഓഫീസില്‍ അതിക്രമിച്ചു കയറി ഡീസല്‍ ഒഴിച്ചു തീ കൊളുത്താന്‍ ശ്രമിച്ച രണ്ടു പേരെ പൊലീസ് പിടികൂടി. എസ്.ടി മോര്‍ച്ച മണ്ഡലം സെക്രട്ടറി രാജന്‍, യൂത്ത് കോണ്‍ഗ്രസ് നെല്ലിക്കാട് വാര്‍ഡ് പ്രസിഡന്റ് സുരേഷ് കുമാര്‍ എന്നിവരാണ് പിടിയിലായത്. അനധികൃത മതില്‍ നിര്‍മ്മാണത്തിന് പഞ്ചായത്ത് അനുമതി നല്‍കിയെന്നാരോപിച്ചായിരുന്നു അക്രമം.
ഓഫീസിലെ മേശയിലും കസേരയിലും ഡീസല്‍ ഒഴിച്ച ശേഷം, തീ കൊളുത്തുമെന്ന് ഭീഷണിപ്പെടുത്തുകയായിരുന്നു. തുടര്‍ന്ന് പഞ്ചായത്ത് സെക്രട്ടറി പൊലീസിനെ വിവരം അറിയിച്ചു. പൊലീസും ജീവനക്കാരും ചേര്‍ന്നാണ് ഇവരെ കീഴ്‌പ്പെടുത്തിയത്. പഞ്ചായത്ത് സെക്രട്ടറി ആര്‍.ടി.ബിജുകുമാര്‍, മാറനല്ലൂര്‍ സ്റ്റേഷനിലെ എ.എസ്.ഐ. മണികണ്ഠന്‍, ഗ്രേഡ് എസ്.ഐ വിന്‍സെന്റ് എന്നിവര്‍ക്ക് സംഘര്‍ഷത്തിനിടെ പരിക്കേറ്റു.
