ലഹരിക്കെതിരെ തെരുവിൽ കലയുടെ സന്ദേശം; ഫ്ലാഷ് മോബ് ശ്രദ്ധേയമായി
.
കൊയിലാണ്ടി: ലഹരിക്കെതിരെ യുവതലമുറയെ അണിനിരത്തിയും പൊതുസമൂഹത്തിൽ ശക്തമായ ബോധവൽക്കരണം ലക്ഷ്യമിട്ടും റോട്ടറി സിഗ്നേച്ചർ കൊയിലാണ്ടിയും ആർ.എസ്.എം. എസ്.എൻ.ഡി.പി. യോഗം കോളേജ് എൻ.സി.സി. യൂണിറ്റും സംയുക്തമായി സംഘടിപ്പിച്ച ലഹരിവിരുദ്ധ ഫ്ലാഷ് മോബ് ശ്രദ്ധേയമായി. കൊയിലാണ്ടി പുതിയ ബസ് സ്റ്റാൻഡ് പരിസരത്ത് നടന്ന പരിപാടി, കലയുടെ ശക്തമായ ആവിഷ്കാരത്തിലൂടെ ലഹരിവിരുദ്ധ സന്ദേശം പൊതുജനങ്ങളിലെത്തിച്ചു.
.
.
എക്സൈസ് പ്രിവന്റീവ് ഓഫീസർ ശിവകുമാർ പരിപാടി ഉദ്ഘാടനം ചെയ്തു. ലഹരി ഉപയോഗം വ്യക്തിയുടെ ആരോഗ്യത്തെയും കുടുംബജീവിതത്തെയും സാമൂഹിക സുരക്ഷയെയും ഗുരുതരമായി ബാധിക്കുന്ന വിപത്താണെന്ന് അദ്ദേഹം പറഞ്ഞു. ലഹരിയുടെ അപകടങ്ങളെക്കുറിച്ച് യുവാക്കളെ ബോധവൽക്കരിക്കുന്നതിനൊപ്പം അവരെ ലഹരിയിൽനിന്ന് അകറ്റിനിർത്താൻ വിദ്യാഭ്യാസ സ്ഥാപനങ്ങളും സാമൂഹിക സംഘടനകളും കൂട്ടായ പ്രവർത്തനങ്ങൾ നടത്തണമെന്നും അദ്ദേഹം ഓർമിപ്പിച്ചു.
.
.
റോട്ടറി സിഗ്നേച്ചർ കൊയിലാണ്ടി പ്രസിഡന്റ് കെ.കെ. ശശി അധ്യക്ഷത വഹിച്ചു. ലഹരിവിരുദ്ധ പ്രവർത്തനങ്ങൾ സമൂഹത്തിന്റെ കൂട്ടായ ഉത്തരവാദിത്വമാണെന്നും യുവാക്കളിൽ ആരോഗ്യകരമായ ജീവിതശൈലിയും സാമൂഹിക പ്രതിബദ്ധതയും വളർത്തിയെടുക്കുന്നതിൽ ഇത്തരം പരിപാടികൾക്ക് വലിയ പങ്കുണ്ടെന്നും അദ്ദേഹം പറഞ്ഞു.
.
ക്യാപ്റ്റൻ മനു പി, ഡോ. പ്രശാന്ത് വി.ജി, ജയ്ജു ആർ. ബാബു, ബാലതിലകൻ, പ്രജിത്ത് വി. എന്നിവർ ആശംസകൾ നേർന്നു. ലഹരിവിരുദ്ധ പോരാട്ടത്തിൽ വിദ്യാർഥികളുടെ സജീവ പങ്കാളിത്തം ഉറപ്പാക്കേണ്ടതിന്റെ ആവശ്യകതയും ലഹരിമുക്തമായ സമൂഹം സൃഷ്ടിക്കാൻ കൂട്ടായ പരിശ്രമം അനിവാര്യമാണെന്ന സന്ദേശവും അവർ പങ്കുവച്ചു. പ്രശോഭ്, സൂരജ്, പ്രൊഫ. സോമൻ, സുഗതൻ തുടങ്ങിയവർ പരിപാടിയിൽ പങ്കെടുത്തു. റോട്ടറി സിഗ്നേച്ചർ കൊയിലാണ്ടി ക്ലബ് സെക്രട്ടറി പ്രജീഷ് എൻ.ഡി. നന്ദി പറഞ്ഞു.
.
ലഹരിയോട് ‘നോ’ പറയാനും ജീവിതത്തോട് ‘യെസ്’ പറയാനും യുവതലമുറയെ പ്രചോദിപ്പിക്കുക എന്ന സന്ദേശമാണ് ഫ്ലാഷ് മോബിലൂടെ ഉയർന്നത്. ലഹരിവിരുദ്ധ ബോധവൽക്കരണത്തിൽ കലയും വിദ്യാർഥികളുടെ പങ്കാളിത്തവും ഫലപ്രദമായി പ്രയോജനപ്പെടുത്താമെന്നതിന്റെ ഉദാഹരണമായി പരിപാടി മാറി.
