പരാമ്പരഗത കർഷകൻ പത്മശ്രീ ചെറുവയൽ രാമൻ (74) അന്തരിച്ചു
.
പരാമ്പരഗത കർഷകൻ പത്മശ്രീ ചെറുവയൽ രാമൻ (74) അന്തരിച്ചു. കോഴിക്കോട് മെഡിക്കൽ കോളേജിൽ വെച്ചാണ് അന്ത്യം. പാരമ്പര്യ നെൽ വിത്ത് സംരക്ഷകൻ എന്ന നിലയിൽ പ്രശസ്തനായ ഇദ്ദേഹത്തെ 2023ൽ രാജ്യം പത്മശ്രീ നൽകി ആദരിച്ചിരുന്നു. ‘നെല്ലച്ഛൻ’ എന്നായിരുന്നു നാട്ടുകാർ വിളിച്ചിരുന്നത്. 1952 ജൂൺ ആറിന് ചെറുവയൽ കുറിച്യത്തറവാട്ടിലെ കേളപ്പന്റെയും തേയിയുടെയും മകനായി ജനിച്ച ചെറുവയൽ രാമൻ ചെറുപ്പത്തിൽ തന്നെ കാർഷിക മേഖലയിൽ താൽപര്യം കാണിച്ചിരുന്നു.
രാമന് ആദരാഞ്ജലികൾ അർപ്പിച്ച് മുഖ്യമന്ത്രി വി ഡി സതീശൻ. വയനാടിന്റെ മണ്ണില്‍ തലമുറകളുടെ ഓര്‍മ്മകള്‍ക്ക് കാവല്‍ നിന്ന കര്‍ഷകനായിരുന്നു ചെറുവയല്‍ രാമനെന്ന് മുഖ്യമന്ത്രി അനുസ്മരിച്ചു അന്യംനിന്നു പോയേക്കാമായിരുന്ന പാരമ്പര്യ നെല്‍ വിത്തിനങ്ങളെ സ്വന്തം ജീവിതത്തിന്റെ ഭാഗമാക്കി, വരും തലമുറയ്ക്കു കരുതിവച്ച ചെറുവയല്‍ രാമന് യാഥാര്‍ത്ഥത്തില്‍ കാര്‍ഷിക പൈതൃകത്തിന്റെ കാവല്‍ക്കാരനായിരുന്നുവെന്നും വി ഡി സതീശന്‍ പറഞ്ഞു.
ബ്രസീലിലെ ലോക കാർഷിക സെമിനാറിലടക്കം ഇന്ത്യയെ പ്രതിനിധീകരിച്ച വ്യക്തി കൂടിയായിരുന്നു ഇദ്ദേഹം. കുന്നുംകുളമ്പൻ, പെരുവക, കുങ്കുമശാലി, കുത്തിച്ചീര, കുഞ്ഞുഞ്ഞി, ഓണമൊട്ടൻ, ഓണച്ചണ്ണ, വെള്ളിമുത്ത്, കനകം, ചെമ്പകം അടക്കമുള്ള നിരവധി നെൽവിത്തുകളുടെ സംരക്ഷകനായിരുന്നു. 2011ൽ ഹൈദരാബാദിൽ വച്ചു നടന്ന ജൈവവൈവിധ്യ സംരക്ഷണത്തിനായുള്ള പതിനൊന്ന് രാജ്യങ്ങളുടെ സമ്മേളനത്തിലും ഇദ്ദേഹം സാന്നിധ്യം അറിയിച്ചിരുന്നു.
