ചാവക്കാട് സ്വകാര്യ ബസുകൾ കൂട്ടിയിടിച്ച് 46 പേർക്ക് പരിക്ക്
ചാവക്കാട്: ചേറ്റുവപാലത്തിൽ സ്വകാര്യ ബസുകൾ കൂട്ടിയിടിച്ച് 46 പേർക്ക് പരിക്കേറ്റു. എട്ടുപേരുടെ നില ഗുരുതരമാണ്. രാവിലെ 9.20ന് ചേറ്റുവ പാലത്തിൽ ഒരുമനയൂർ ഭാഗത്താണ് അപകടമുണ്ടായത്. എറണാകുളത്തു നിന്ന് ഗുരുവായൂരിലേക്ക് പോയ ആറ്റുപറന്പത്ത് ബസും, ഗുരുവായൂരിൽ നിന്ന് എറണാകുളത്തേക്ക് പോയ പ്രിൻസ് ബസുമാണ് പാലത്തിൽ മുഖാമുഖം ഇടിച്ചത്. ഓടിയെത്തിയ നാട്ടുകാരാണ് രക്ഷാപ്രവർത്തനം നടത്തിയത്.
രണ്ടു ബസിലും നിറയെ യാത്രക്കാരുണ്ടായിരുന്നു. പരിക്കേറ്റവരിൽ എട്ടു പേരെ മുതുവട്ടൂർ രാജാ ആശുപത്രിയിലും, 10 പേരെ ഏങ്ങണ്ടിയൂർ എംഐ ആശുപത്രിയിലും, 28 പേരെ ചേറ്റുവ പി.എം ആശുപത്രിയിലും പ്രവേശിപ്പിച്ചു. പാലത്തിനു മുകളിൽവച്ച് മുന്നിൽ പോയിരുന്ന ഓട്ടോറിക്ഷയെ ഗുരുവായൂരിലേക്ക് പോയ ബസ് മറികടക്കുന്പോഴാണ് അപകടം. അപകടം നടക്കുന്പോൾ ചാറ്റൽമഴ ഉണ്ടായിരുന്നു. ചാവക്കാട് പോലീസും ഹൈവേ പോലീസും ഏഴ് ആംബുലൻസുകളും രക്ഷാപ്രവർത്തനത്തിന് നേതൃത്വം നൽകി.
