കെ.ടി. അശ്വതിക്ക് ഇന്ന് കായക്കൊടിയില്‍ പൗരസ്വീകരണം
കുറ്റ്യാടി: ലോക വനിതാദിനത്തില്‍ ഗുജറാത്തിലെ ഗാന്ധി നഗറില്‍ നടന്ന സ്വച്ഛ്ശക്തി 2017 സമ്മേളനത്തില്‍ പങ്കെടുത്ത കേരളത്തില്‍ നിന്നുള്ള വനിതാ പ്രസിഡന്റുമാരുടെ മതപരമായ വിശ്വാസത്തിന്റെ ഭാഗമായ ശിരോവസ്ത്രം അഴിപ്പിച്ച സംഭവം പുറം ലോകത്തെ അറിയിച്ച കായക്കൊടി പഞ്ചായത്ത് പ്രസിഡന്റ് കെ.ടി. അശ്വതിക്ക് ഇന്ന് കായക്കൊടിയില്‍ പൗരസ്വീകരണം നല്‍കും.
സ്ത്രീ ശാക്തികരണം ലക്ഷ്യം വെച്ച്‌ പ്രധാനമന്ത്രിയുടെ സാന്നിധ്യത്തില്‍ രാജ്യത്തിന്റെ വിവിധഭാഗങ്ങളില്‍ നിന്നുള്ള ആറായിരത്തോളം വനിത പഞ്ചായത്ത് പ്രസിഡന്റുമാര്‍ പങ്കെടുത്ത പരിപാടിയിലാണ് കേരളത്തില്‍ നിന്നുള്ള മുസ്ലിം വനിത പ്രസിഡന്റുമാരെ അവഹേളിച്ചത്.
ഈ സംഭവം സമൂഹ മാദ്ധ്യമങ്ങളിലൂടെ പുറംലോകത്തെ അറിയിക്കുകയും, പ്രശ്നത്തില്‍ ഇടപെട്ട് അധികൃതരുടെ നടപടിക്കെതിരെ ശക്തമായി പ്രതികരിക്കുകയും ചെയ്തത് അശ്വതിയായിരുന്നു. ഇന്ന് കായക്കൊടിയില്‍ നടക്കുന്ന സ്വീകരണപരിപാടി പൊതുമരാമത്ത് മന്ത്രി ജി. സുധാകരന്‍ ഉദ്ഘാടനം ചെയ്യും. ഇ.കെ. വിജയന്‍ എം.എല്‍.എ അദ്ധ്യക്ഷത വഹിക്കും. ജില്ലാ പഞ്ചായത്ത് പ്രസിഡന്റ് ബാബു പറശ്ശേരി മുഖ്യ അതിഥിയാവും.സാമുൂഹ്യ,രാഷ്ട്രീയരംഗത്തെ പ്രമുഖര്‍ പങ്കെടുക്കുമെന്ന് സംഘാടകസമിതി ഭാരവാഹികളായ പ്രേംരാജ് കായക്കൊടി, എം.കെ.ശശി,കെ.കെ.ഉമ്മര്‍എന്നിവര്‍ അറിയിച്ചു.
