സാഹിത്യകാരി സാറാ തോമസ് അന്തരിച്ചു
സാഹിത്യകാരി സാറാ തോമസ് അന്തരിച്ചു. 88 വയസ്സായിരുന്നു. തിരുവനന്തപുരം നന്ദാവനത്തെ വീട്ടിലായിരുന്നു അന്ത്യം. ചെറുകഥാകൃത്ത്, നോവലിസ്റ്റ്, എന്നീ നിലകളില്‍ ശ്രദ്ധേയയാണ്. കേരള സാഹിത്യ അക്കാദമി പുരസ്‌കാരം ഉള്‍പ്പെടെ നിരവധി പുരസ്‌കാരങ്ങള്‍ നേടിയിട്ടുണ്ട്.
1934 ല്‍ തിരുവനന്തപുരത്താണ് സാറാ തോമസിൻ്റെ ജനനം. ഇരുപതോളം നോവലുകള്‍ രചിച്ചിട്ടുണ്ട്. ‘ജീവിതം എന്ന നദി’ ആണ് ആദ്യനോവല്‍. സാറാ തോമസിൻ്റെ ‘മുറിപ്പാടുകള്‍’ എന്ന നോവല്‍ പി.എ ബക്കര്‍ ‘മണിമുഴക്കം’ എന്ന സിനിമയാക്കി. സാറാ തോമസിൻ്റെ അസ്തമയം, പവിഴമുത്ത്, അര്‍ച്ചന എന്നീ നോവലുകളും ചലച്ചിത്രങ്ങള്‍ക്ക് പ്രമേയങ്ങളായിട്ടുണ്ട്. സംസ്ക്കാരം നാളെ ഉച്ചയ്ക്ക് രണ്ടുമണിക്ക് തിരുവനന്തപുരം പാറ്റൂർ മർത്തോമ പള്ളി സെമിത്തേരിയിൽ നടക്കും.
