എലത്തൂർ ട്രെയിൻ അക്രമം സംഭവത്തിലെ പ്രതിയെ മൂന്നു ദിവസത്തിനകം പിടികൂടിയ അന്വേഷണ സംഘത്തെ മുഖ്യമന്ത്രി അഭിനന്ദിച്ചു
എലത്തൂർ ട്രെയിൻ അക്രമം സംഭവത്തിലെ പ്രതിയെ മൂന്നു ദിവസത്തിനകം പിടികൂടിയ അന്വേഷണ സംഘത്തെ മുഖ്യമന്ത്രി അഭിനന്ദിച്ചു. സംഭവം നടന്ന ഉടൻ തന്നെ കുറ്റക്കാരെ കണ്ടെത്തുവാന് സംസ്ഥാന പോലീസ് മേധാവിക്ക് നിര്ദ്ദേശം നല്കിയിരുന്നു. സ്പെഷ്യല് ഇന്വെസ്റ്റിഗേഷന് ടീം രൂപീകരിക്കുകയും ശാസ്ത്രീയ പരിശോധനയടക്കം നടത്തി തെളിവ് ശേഖരിക്കുകയും ചെയ്തു. അതിൻ്റെ ഭാഗമായി പ്രതിയെ മഹാരാഷ്ട്രയിലെ രത്നഗിരിക്ക് സമീപം പിടികൂടാന് കഴിഞ്ഞു.
കേസുമായി ബന്ധപ്പെട്ട് രാജ്യത്തിൻ്റെ വിവിധ ഭാഗങ്ങളില് അന്വേഷണം തുടരുന്നതിനിടയിലാണ് പ്രതി പൊലീസ് കസ്റ്റഡിയിലായത്. സംഭവ സ്ഥലത്ത് നിന്ന് കടന്നു കളഞ്ഞ അക്രമിയെ മൂന്നു ദിവസത്തിനുള്ളില് തന്നെ പിടികൂടാന് കഴിഞ്ഞത് കേരള പൊലീസിൻ്റെ അന്വേഷണ മികവിൻ്റെയും മറ്റു സംസ്ഥാനങ്ങളിലെയും രാജ്യത്തെയും വിവിധ ഏജന്സികളുടെ സഹകരണത്തിൻ്റെയും ഫലമായിട്ടാണ്.
അന്വേഷണത്തില് പങ്കാളികളായ എല്ലാ പൊലീസ് ഉദ്യോഗസ്ഥർക്കും മഹാരാഷ്ട്ര എ.ടി.എസ്, കേന്ദ്ര ഇൻ്റലിജന്സ്, റയില്വെ അടക്കം സഹകരിച്ച മറ്റ് ഏജന്സികൾ എന്നിവർക്കും അദ്ദേഹം അഭിനന്ദനം അറിയിച്ചു.
