കടയിൽനിന്ന് സാധനം വാങ്ങവെ ഉണ്ടായ തർക്കത്തില്‍ വ്യാപാരിക്ക് മർദ്ദനം
കൊയിലാണ്ടി: കടയില്‍ നിന്ന് സിഗരറ്റു വാങ്ങിയ പണവുമായി ബന്ധപ്പെട്ട തർക്കത്തില്‍ വ്യാപാരിക്ക് മർദ്ദനം. അക്രമത്തിൽ വ്യാപാരിയുടെ രണ്ടു പല്ലുകള്‍ അടിച്ചു കൊഴിച്ചു. നഗരസഭയിലെ ആഴവില്‍താഴ പലചരക്കു കട നടത്തുന്ന വ്യാപാരിയെയാണ് ആക്രമിച്ചത്. പല്ലു നഷ്ടപ്പെട്ട മഞ്ഞളാട്ടു പറമ്പില്‍ അബ്ദുല്‍ റസാഖിനെ (50) കൊയിലാണ്ടി താലൂക്ക് ഹെഡ്ക്വാര്‍ട്ടേഴ്സ് ആശുപത്രിയില്‍ പ്രവേശിപ്പിച്ചു.
മുന്‍ നിരയിലെ രണ്ടു പല്ലുകളാണ് നഷ്ടപ്പെട്ടത്. സിഗരറ്റു വാങ്ങിയ ശേഷം അതിൻ്റെ പണവുമായി ബന്ധപ്പെട്ട പ്രശ്നമാണ് അക്രമത്തില്‍ കലാശിച്ചത്. സമീപത്തെ താമസക്കാരനായ രാരന്‍കണ്ടി ചന്ദ്രനാണ് (55)അക്രമം നടത്തിയതെന്ന് റസാഖ് നല്‍കിയ പരാതിയില്‍ പറഞ്ഞു. അഞ്ചുരൂപ നല്‍കാതെ നല്‍കിയെന്നു പറഞ്ഞ് പ്രശ്നമുണ്ടാക്കുകയായിരുന്നെന്ന് പരാതിയില്‍ പറഞ്ഞു. വ്യാഴാഴ്ച ഉച്ച പന്ത്രണ്ടു മണിയോടെയായിരുന്നു സംഭവം. കൊയിലാണ്ടി പൊലീസ് ജാമ്യമില്ലാ വകുപ്പു പ്രകാരം കേസെടുത്തു.
