വാഹന യാത്രക്കാരനുനേരെ തോക്ക് ചൂണ്ടിയ യുവാവ് അറസ്റ്റിൽ
എലത്തൂര്: വാഹന യാത്രക്കാരനുനേരെ തോക്ക് ചൂണ്ടിയതിന് യുവാവിനെ അറസ്റ്റ് ചെയ്തു. എരഞ്ഞിക്കല് കളത്തില് താഴത്ത് അബിയെയാണ് (26) വെള്ളിയാഴ്ച എലത്തൂര് പൊലീസ് അറസ്റ്റ് ചെയ്തത്. രാവിലെ ഏഴരയോടെ എടക്കാട് സ്വകാര്യ ആശുപത്രിക്ക് സമീപത്തു വെച്ചാണ് ഗുഡ്സ് വാഹനത്തിലുണ്ടായിരുന്നവര്ക്കെതിരെ യുവാവ് തോക്ക് ചൂണ്ടിയത്.
കാരപ്പറമ്പ് ഭാഗത്തുനിന്ന് വരുകയായിരുന്ന അബി ഓടിച്ച കാറിനെ ഗുഡ്സ് വാഹനം മറികടക്കുകയായിരുന്നു. ഗുഡ്സ് വാഹനത്തിന് വശം കൊടുത്തില്ലെന്ന കാരണത്താല് പിന്നീട് വശം കൊടുക്കാതെ ഗുഡ്സ് വാഹനവും പോവുകയായിരുന്നു. ക്ഷുഭിതനായ അബി ഗുഡ്സ് വാഹനത്തെ മറികടക്കവേ തന്റെ കാറിലുണ്ടായിരുന്ന എയര്ഗണ് എടുത്ത് ഗുഡ്സ് വാഹന ഡ്രൈവര്ക്കെതിരെ ചൂണ്ടുകയായിരുന്നു.
ഇതേത്തുടര്ന്ന് പൊലീസിനെ വിളിച്ച് വിവരം അറിയിക്കുകയും കാറിനെ മറികടന്ന് ഗുഡ്സ് വാഹനം കുറുകെ നിര്ത്തുകയും ചെയ്തു. എലത്തൂര് ഐ.പി എം. സായൂജ്, പ്രിന്സിപ്പല് എസ്.ഐ രാജേഷ് കുമാര്, എസ്.ഐ കെ.രാജീവ് എന്നിവര് സ്ഥലത്തെത്തി അബിയെ അറസ്റ്റ് ചെയ്യുകയും കാര് കസ്റ്റഡിയിലെടുക്കുകയും ചെയ്തു. എയര്ഗണ് സുഹൃത്തിന്റെതാണെന്നും ടിക് ടോക് വിഡിയോക്കുവേണ്ടി തമാശക്ക് ചെയ്തതാണെന്നും അബി പൊലീസിനോട് പറഞ്ഞു. ഹോട്ടല് മാനേജ്മെന്റ് വിദ്യാര്ഥിയാണ് അബി.