കുട്ടികളുടെ ഹാജര്‍ നില പരിശോധിക്കാന്‍ ഇ-ഹാജര്‍ പട്ടികയുമായി അധ്യാപകന്‍
പേരാമ്പ്ര: വിദ്യാലയങ്ങളിലെ ഓണ്‍ലൈന്‍ ക്ലാസുകളില്‍ കുട്ടികളുടെ ഹാജര്‍ നില പരിശോധിക്കാന്‍ ഇ-ഹാജര്‍ പട്ടികയുമായി അധ്യാപകന്‍. പേരാമ്പ്ര എന്‍.ഐ.എം.എല്‍.പി സ്കൂള്‍ അധ്യാപകന്‍ മുഹമ്മദ് ഷാഫിയാണ് ഇതു തയാറാക്കിയത്. കുട്ടികള്‍ക്ക് നല്‍കുന്ന ഓണ്‍ലൈന്‍ ലിങ്ക് വഴി അവരുടെ റോള്‍ നമ്ബര്‍ ഉപയോഗിച്ച്‌ ഹാജര്‍ ഇതിലൂടെ അറിയാം. ഓരോ ദിവസത്തെയും ക്ലാസിന്‍റെ മുമ്പ് നല്‍കുന്ന ലിങ്ക് ഉപയോഗിച്ച്‌ നിശ്ചിത സമയത്തിനുള്ളില്‍ വിദ്യാര്‍ഥികള്‍ക്ക് ഹാജര്‍ രേഖപ്പെടുത്താനും ക്ലാസിന്‍റെ അവസാനത്തില്‍ ഹാജര്‍ റിപ്പോര്‍ട്ട് ക്ലാസ് ഗ്രൂപ്പുകളില്‍ ലഭ്യമാക്കുന്ന രീതിയിലാണ് സോഫ്റ്റ്‌വെയറിന്‍റെ പ്രവര്‍ത്തനം.
ഓരോ യൂനിറ്റിന്‍റെയും അവസാനത്തില്‍ വിദ്യാര്‍ഥി എത്ര ഓണ്‍ലൈന്‍ ക്ലാസുകളില്‍ പങ്കെടുത്തു എന്ന് രക്ഷാകര്‍ത്താവിന് പരിശോധിക്കാനും സോഫ്റ്റ്‌വെയറിലൂടെ കഴിയും. സ്വന്തം ക്ലാസില്‍നിന്ന് തുടങ്ങിയ സോഫ്റ്റ്‌വെയറിന്‍റെ പ്രവര്‍ത്തനം സ്കൂളിലെ മുഴുവന്‍ ക്ലാസുകളിലേക്കും വ്യാപിപ്പിക്കാനുള്ള ശ്രമത്തിലാണ് ഇദ്ദേഹം.
