ഭിന്നശേഷിക്കാർക്കുവേണ്ടി കിലയുടെ കെെപുസ്തകം; മന്ത്രി എം ബി രാജേഷ് പുറത്തിറക്കി
തൃശുർ: ഭിന്നശേഷിക്കാർക്കുവേണ്ടി കില പുറത്തിറക്കിയ കെെപുസ്തകം തദ്ദേശ സ്വയം ഭരണമന്ത്രി എം ബി രാജേഷ് ഉദ്ഘാടനം ചെയ്തു. പുസ്തകത്തിൽ ഏഴുതരം ഭിന്നശേഷി സൗഹൃദ മാർഗങ്ങളാണ്‌ ഉൾക്കൊള്ളിച്ചിരിക്കുന്നതെന്നും ഭിന്നശേഷി വിഭാഗത്തിലുള്ള ഉദ്യോഗസ്ഥർക്കും ജനങ്ങൾക്കും തദ്ദേശ സ്വയംഭരണ സ്ഥാപനങ്ങളെ സംബന്ധിച്ച വിശദമായ അറിവുകൾ നൽകുന്നതാണ് കെെപുസ്തകമെന്നും മന്ത്രി പറഞ്ഞു.
എം ബി രാജേഷിൻറെ പോസ്റ്റ് ചുവടെ
ഭിന്നശേഷി വിഭാഗത്തിൽപ്പെട്ടവരെ ചേർത്തുപിടിച്ചുകൊണ്ടാണ്‌ സർക്കാർ മുന്നോട്ടുപോകുന്നത്. ഇപ്പോഴിതാ കേരളത്തിലെ ഭിന്നശേഷി വിഭാഗത്തിലുള്ള ഉദ്യോഗസ്ഥർക്കും ജനങ്ങൾക്കും തദ്ദേശ സ്വയംഭരണ സ്ഥാപനങ്ങളെ സംബന്ധിച്ച വിശദമായ അറിവുകൾ നൽകാനായി ഒരു കൈപ്പുസ്തകം പുറത്തിറക്കിയിരിക്കുകയാണ്‌. ഗ്രാമസഭ, പഞ്ചായത്ത് രാജ് നിയമം, പൗരാവകാശ രേഖ, സിവിൽ രജിസ്ട്രേഷൻ തുടങ്ങി എല്ലാ വിഷയങ്ങളെക്കുറിച്ചും ഭിന്നശേഷിക്കാർക്ക്‌ പുസ്തകം കൃത്യമായ ധാരണ നൽകുന്നു.
പുസ്തകത്തിൽ ഏഴുതരം ഭിന്നശേഷി സൗഹൃദ മാർഗങ്ങളാണ്‌ ഉൾക്കൊള്ളിച്ചിരിക്കുന്നത്‌. കാഴ്ചയില്ലാത്ത വ്യക്തികൾക്കായി ബ്രെയിലി ലിപിയും, കാഴ്ച പരിമിതർക്കായി വലിയ അക്ഷരങ്ങളും, സംസാര വെല്ലുവിളികൾ നേരിടുന്നവർക്ക് വേണ്ടി ആംഗ്യഭാഷയും അതോടൊപ്പം അടിക്കുറിപ്പുകളും, സാങ്കേതികവിദ്യയുടെ സഹായത്തോടുകൂടി ക്യു ആർ കോഡ് ഉപയോഗിച്ച് കേൾക്കാവുന്ന ശബ്ദ വിവരണങ്ങളും, മൊബൈലിലോ കമ്പ്യൂട്ടറിലോ ടോക്ക് ബാക്ക് സാങ്കേതികവിദ്യ ഉപയോഗിച്ചുകൊണ്ട് കേൾക്കാവുന്ന ഇ പ്രിന്റും ഉൾക്കൊള്ളിച്ചതാണ്‌ പുസ്തകം. ഭിന്നശേഷി സൗഹൃദ അച്ചടി പ്രസിദ്ധീകരണം എന്ന ആശയം രാജ്യത്തിന്‌ മാത്രമല്ല ലോകത്തിന്‌ തന്നെ മാതൃകയാണ്‌. പുസ്തകം തയ്യാറാക്കിയ കിലയെ പ്രത്യേകം അഭിനന്ദിക്കുന്നു.
ഭിന്നശേഷിക്കാർക്ക്‌ കാര്യങ്ങൾ ഫലപ്രദമായി നിർവഹിക്കാൻ ഇത്തരം ഇടപെടലുകൾ സഹായകരമാവും. എല്ലാവരെയും ചേർത്തുനിർത്തി നവകേരളം എന്ന ലക്ഷ്യത്തിലേക്കാണ്‌ സർക്കാർ മുന്നോട്ടുപോകുന്നത്. തദ്ദേശ സ്വയംഭരണ സ്ഥാപനങ്ങളിൽ വരുന്ന ഭിന്നശേഷിയുള്ള വ്യക്തികൾക്കും ഉദ്യോഗസ്ഥർക്കും ഒരുപോലെ ഉപയോഗിക്കാൻ കഴിയുന്ന രീതിയിലാണ് പുസ്തകം രൂപകൽപ്പന ചെയ്തിട്ടുള്ളത്. ഉദ്യോഗസ്ഥരിൽ ഒരാളായ വിദ്യ മോൾ പുസ്തകം ചടങ്ങിൽ വായിച്ചു. സൈൻ ലാംഗ്വേജ് ഇൻറർപ്രട്ടർ പി എസ് വിനയചന്ദ്രനെ ചടങ്ങിൽ ആദരിച്ചു. വടക്കാഞ്ചേരി എം എൽ എ സേവ്യർ ചിറ്റിലപ്പിള്ളി, കില ഡയറക്ടർ ജനറൽ ജോയ്‌ ഇളമൺ എന്നിവരും പങ്കെടുത്തു.
