സ്റ്റൗവ്വില്‍ നിന്ന് അബദ്ധത്തില്‍ മണ്ണണ്ണ ശരീരത്തിലേക്ക് മറിഞ്ഞു: വിദ്യര്‍ത്ഥിനിക്ക് ദാരുണ മരണം
മണ്ണാര്‍ക്കാട്: വീട്ടിലെ കണ്ണിലുണ്ണിയായിരുന്നു അതിര. പ്ലസ് വണ്‍ വിദ്യാര്‍ത്ഥിനിയായ പെണ്‍കുട്ടിക്ക് കഴിഞ്ഞ ദിവസം സംഭവിച്ച ദുരന്തം കേട്ട് തരിച്ചിരിക്കുകയാണ് നാട്ടുകാര്‍.
അമ്മയും അയല്‍ക്കാരിയും പുറത്ത് നിന്ന് സംസാരിക്കുമ്ബോള്‍ അടുക്കളയിലായിരുന്നു ആതിര. ഭക്ഷണം ഉണ്ടാക്കുന്നത് മണ്ണെണ്ണ ഗ്യാസില്‍ ആയിരുന്നു. കുറച്ച്‌ കഴിഞ്ഞ് അടുക്കളയില്‍ നിന്ന് ശബ്ദവും തീയും പുകയും കണ്ടതോടെ അമ്മ അടുക്കളയിലേക്ക് ഓടുകയായിരുന്നു. അപ്പോഴാണ് ഗ്യാസ് മറിഞ്ഞ് വീണതും അതിലെ മണ്ണെണ്ണ മകളുടെ ശരീരത്തില്‍ പടര്‍ന്ന് തീയാളുന്നത് കണ്ടത്.
പെട്ടന്നുള്ള ഭയത്തില്‍ എന്ത് ചെയ്യണമെന്നറിയാതിരുന്ന അമ്മ സന്ധ്യ ഉടന്‍ അടുത്ത് കണ്ട വെള്ളം ആതിരയുടെ ശരീരത്തിലേക്ക് ഒഴിക്കുകയായിരുന്നു, എന്നാല്‍ അപ്പോഴേക്കും അഗ്നി ആതിരയെ വിഴുങ്ങിയിരുന്നു. ഉടന്‍ തന്നെ അടുത്തുള്ള വീട്ടുകാര്‍ എത്തി തീ പൂര്‍ണമായി അണച്ചിരുന്നെങ്കിലും പെണ്‍കുട്ടി പൂര്‍ണമായും അഗ്നിക്കിരയായിരുന്നു.
ഉടന്‍ തന്നെ ആതിരയെ മണ്ണാര്‍ക്കാട്ടെ സ്വകാര്യ ആശുപത്രിയില്‍ എത്തിച്ചു. എന്നാല്‍ വിദഗ്ദ ചികില്‍സക്കായി കോഴിക്കോട് മെഡിക്കല്‍ കോളേജില്‍ എത്തിച്ചെങ്കിലും മരണപ്പെടുകയായിരുന്നു.
വീടിന്റെ അടുക്കളയും ശുചിമുറിയും അതിനോട് അനുബന്ധിച്ച്‌ ഭാഗങ്ങളും പൂര്‍ണ്ണമായും കത്തി നശിച്ചിരുന്നു. മണ്ണാര്‍ക്കാട് കോട്ടോപ്പാടം പുറ്റാനിക്കാട് ചള്ളപ്പുറത്ത് വീട്ടില്‍ ആതിര അരിയല്ലൂര്‍ വി.എച്ച്‌.എസി.യിലെ ആദ്യ വര്‍ഷവിദ്യര്‍ഥിനിയാണ്. രണ്ട് സഹോദരങ്ങളാണ് ഉള്ളത്.
