രാഹുല് മാങ്കൂട്ടത്തിലിനെതിരായ എല്ലാ പരാതികളും വിശ്വസനീയം: ഫാത്തിമ തഹ്ലിയ
മലപ്പുറം: യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തില് എംഎല്എയ്ക്കെതിരെ മൂസ്ലിം യൂത്ത് ലീഗ് നേതാവ് ഫാത്തിമ തഹ്ലിയ. രാഹുലിനെതിരായ എല്ലാ പരാതികളും വിശ്വസനീയമെന്ന് തഹ്ലിയ പ്രതികരിച്ചു. ആ സ്ത്രീകളുടെ മാനസികാവസ്ഥ മനസിലാക്കുന്നുവെന്നും തഹ്ലിയ പറഞ്ഞു. ഗുരുതര ആരോപണങ്ങള് ഉയര്ന്ന സാഹചര്യത്തില് രാഹുല് മാങ്കൂട്ടത്തിലിനെതിരെ വ്യാപക പ്രതിഷേധമാണ് ഉയരുന്നത്. രാഹുല് മാങ്കൂട്ടത്തിലിന്റെ രാജി ആവശ്യപ്പെട്ട് ഡിവൈഎഫ്ഐ, ബിജെപി പ്രവര്ത്തകര് പ്രതിഷേധം സംഘടിപ്പിച്ചു.
യൂത്ത് കോണ്ഗ്രസ് സംസ്ഥാന അദ്ധ്യക്ഷ സ്ഥാനത്ത് നിന്ന് രാജിവെക്കാന് രാഹുല് മാങ്കൂട്ടത്തില് എംഎല്എയ്ക്ക് എഐസിസി നിര്ദേശം നല്കിയിരുന്നു. പാര്ട്ടി സംസ്ഥാന നേതൃത്വത്തോടായിരുന്നു ഹൈക്കമാന്ഡ് വിശദാംശങ്ങള് തേടിയത്. നിലവിലെ ആരോപണങ്ങള് പുറത്തുവരും മുന്പ് തന്നെ രാഹുലിനെതിരെ പരാതി ലഭിച്ചിരുന്നു. അന്വേഷിക്കാന് സംസ്ഥാനത്തിന്റെ ചുമതലയുള്ള എഐസിസി ജനറല്സെക്രട്ടറി ദീപദാസ് മുന്ഷി കെപിസിസി നേതൃത്വത്തിന് നിര്ദേശം നല്കിയിരുന്നു. ശേഷം ലഭിച്ച വിവരങ്ങളില് രാഹുലിനെതിരെ ഉയര്ന്ന ആരോപണങ്ങളില് കഴമ്പുണ്ടെന്ന് കണ്ടെത്തിയിരുന്നു. അതിന് ശേഷമാണ് യൂത്ത് കോണ്ഗ്രസ് സംസ്ഥാന അദ്ധ്യക്ഷ സ്ഥാനത്ത് നിന്ന് രാജിവെക്കാന് നിര്ദേശം നല്കിയത്.
കഴിഞ്ഞ ദിവസം യുവ നേതാവിനെതിരെ മാധ്യമപ്രവര്ത്തക നടത്തിയ വെളിപ്പെടുത്തല് വ്യാപക ചര്ച്ചയ്ക്ക് വഴിവെച്ചത്. മാധ്യമപ്രവര്ത്തക ആരോപണം ഉന്നയിച്ചത് രാഹുല് മാങ്കൂട്ടത്തിലിനെതിരെയെന്നായിരുന്നു സോഷ്യല് മീഡിയയില് അടക്കം ചര്ച്ചയായത്. ഇതിനിടെ രാഹുല് മാങ്കൂട്ടത്തിലിനെതിരെ ഗുരുതര വെളിപ്പെടുത്തലുമായി ഹണി ഭാസ്കരനും രംഗത്തെത്തിയിരുന്നു. ‘രാഹുല് മാങ്കൂട്ടം-അനുഭവം’ എന്ന തലക്കെട്ടോടെ ഫേസ്ബുക്കില് പങ്കുവെച്ച കുറിപ്പിലായിരുന്നു ഹണി ഭാസ്കരന് തുറന്നെഴുതിയത്.
മാത്രവുമല്ല, യൂത്ത് കോണ്ഗ്രസ് സംസ്ഥാന അധ്യക്ഷന് രാഹുല് മാങ്കൂട്ടത്തില് എംഎല്എക്കെതിരായ ഗുരുതര ശബ്ദ സംഭാഷണം റിപ്പോര്ട്ടര് പുറത്ത് വിട്ടിരുന്നു. രാഹുല് മാങ്കൂട്ടത്തില് യുവതിയെ ഗര്ഭച്ഛിദ്രത്തിന് സമ്മര്ദ്ദം ചെലുത്തുന്ന ശബ്ദ സംഭാഷണത്തിന്റെ പ്രസക്തഭാഗമായിരുന്നു റിപ്പോര്ട്ടര് പുറത്തുവിട്ടത്. സ്വകാര്യത മാനിച്ച് ഫോണ് സംഭാഷണത്തില് യുവതിയുടെ ശബ്ദം എഡിറ്റ് ചെയ്താണ് റിപ്പോര്ട്ടര് സന്ദേശം പുറത്തുവിട്ടത്.
