പയ്യോളി റെയിൽവെ സ്റ്റേഷനിൽ ട്രെയിൻ നിർത്താതെപോയ സംഭവം കർശന നടപടി സ്വീകരിക്കണമെന്ന് മർഡാക്ക് ആവശ്യപ്പെട്ടു
ചേമഞ്ചേരി: പയ്യോളി റെയിൽവേ സ്റ്റേഷനിൽ ആലപ്പുഴ – കണ്ണൂർ എക്സിക്യൂട്ടീവ് എക്സ്പ്രസ്സ്‌ നിർത്താതെപോയ സംഭവത്തിൽ റെയിൽവെ മന്ത്രാലയം കർശന നടപടി സ്വീകരിക്കണമെന്ന് മലബാർ റെയിൽവേ ഡെവലപ്പ്മെൻ്റ് കൌൺസിൽ (മർഡാക്) ചെയർമാൻ എംപി മൊയ്‌തീൻ കോയ ആവശ്യപ്പെട്ടു. 16307 ആലപ്പുഴ കണ്ണൂർ എക്സിക്യൂട്ടീവ് എക്സ്പ്രസ്സ്‌ റണ്ണിംഗ് സ്റ്റാറ്റസ് പ്രകാരം ട്രെയിൻ രാത്രി 10മണിക്ക് പയ്യോളി സ്റ്റേഷനിൽ എത്തിച്ചേരേണ്ടതാണ്. എന്നാൽ ട്രെയിൻ ജൂലൈ 11ന് ശനിയാഴ്ച രാത്രി 10.56നാണ് പയ്യോളിസ്റ്റേഷനിൽ നിർത്താതെ കടന്നു പോയത്.
യാത്രക്കാർ ബഹളംവച്ചപ്പോൾ 2 കിലോ മീറ്റർ ദൂരം മാറി അയനിക്കാട് സ്റ്റേഷനിലാണ് നിർത്തിയത്. ശക്തമായ കാറ്റും മഴയും ഉള്ളതിനാൽ ഫ്ലാറ്റ് ഫോം ഇല്ലാതെ നിറയെ കുറ്റിക്കാടുകളുള്ള അയനിക്കാട് ഇറങ്ങാൻ രോഗികളും പ്രായമു ള്ളവരുംഏറെ പ്രയാസപ്പെട്ടു.
കുറേ യാത്രക്കാർ വടകരയിലും ഇറങ്ങി. കണ്ണൂർ ഭാഗത്തേക്കു പോകാൻ വന്നവരും യാത്ര മുടങ്ങി. സംഭവത്തിൽ ലോക്കോ പൈലറ്റിനെതിരെ കർശന നടപടി സ്വീകരിക്കണമെന്ന് റെയിൽവേബോർഡ്‌ ചെയർമാന് മർഡാക്ക് നൽകിയ നിവേദനത്തിൽ ആവശ്യപെട്ടു.
