വിവാഹ വാഗ്ദാനം നല്‍കി വിധവയായ സ്ത്രീയെ പീഡിപ്പിച്ച കേസില്‍ യുവാവ് അറസ്റ്റില്‍
വൈപ്പിന്‍: വിവാഹ വാഗ്ദാനം നല്‍കി വിധവയായ സ്ത്രീയെ ചെറായി ബീച്ചിലെ ഒരു റിസോര്‍ട്ടില്‍ കൊണ്ട് വന്ന് പീഡിപ്പിച്ച കേസില്‍ യുവാവിനെ മുനന്പം പോലീസ് അറസ്റ്റു ചെയ്തു. പെരുന്പാവൂര്‍ പാറപ്പുറം മാലേത്ത് വീട്ടില്‍ മൂസയുടെ മകന്‍ ബാബു(36) വാണ് അറസ്റ്റിലായത്. കൊല്ലം സ്വദേശിനിയായ യുവതി പെരുന്പാവൂര്‍ പോലീസിനു നല്‍കിയ പരാതിയില്‍ ബലാത്സംഗത്തിനു കേസെടുത്ത് മുനന്പം പോലീസിനു കൈമാറിയിരുന്നു. പീഡനം നടന്നത് മുനന്പം സ്റ്റേഷന്‍ പരിധിയിലായതിനാലാണിത്.
2017 മാര്‍ച്ച്‌ മുതല്‍ 2018 ഓഗസ്റ്റ് മാസം വരെ വിവിധ ദിനങ്ങളിലായി ചെറായി ബീച്ചിലെ ഒരു റിസോര്‍ട്ടില്‍ കൊണ്ട് വന്ന് പീഡിപ്പിച്ചുവെന്നാണ് യുവതിയുടെ മൊഴി. യുവാവ് മുന്‍കൂര്‍ ജാമ്യത്തിനു ശ്രമിച്ചെങ്കിലും ലഭിച്ചില്ല. ഇതിനിടെ പ്രതി വീണ്ടും പരാതിക്കാരിയുടെ പിന്നാലെ കൂടിയതോടെ പനങ്ങാട് പോലീസ് സ്റ്റേഷന്‍ അതിര്‍ത്തിയില്‍ നിന്നും ബുധനാഴ്ച രാത്രി ഇയാളെ പോലീസ് അറസ്റ്റ് ചെയ്യുകയായിരുന്നു. ഞാറക്കല്‍ ഫസ്റ്റ് ക്ലാസ് മജിസ്ട്രേറ്റ് കോടതിയില്‍ ഹാജരാക്കിയ പ്രതിയെ റിമാന്‍ഡ് ചെയ്തു.
