ചാനല്‍ വാര്‍ത്ത ബിജുരമേശിനെതിരെ മാനനഷ്ടകേസ്‌
തിരുവനന്തപുരം :എസ്.എന്‍.ഡി.പി യോഗം വക്താവ് അഡ്വ.കെ.എം. സന്തോഷ് കുമാറിന്റെ ഭാര്യയെക്കുറിച്ച്‌ വാര്‍ത്താ ചാനലിലൂടെ അപമര്യാദയായി സംസാരിച്ച സംഭവത്തില്‍ ബിജു രമേശിനെതിരെ സംസ്ഥാന മനുഷ്യാവകാശ കമ്മിഷന്‍ അദ്ധ്യക്ഷന്‍ ജസ്റ്റിസ് ജെ.ബി.കോശി കേസെടുത്ത് നോട്ടീസയച്ചു. സന്തോഷ്‌കുമാറിന്റെ ഭാര്യ സമര്‍പ്പിച്ച പരാതിയിലാണ് നടപടി. ഭര്‍ത്താവ് പങ്കെടുക്കുന്ന ചര്‍ച്ച ഏറ്റുമാനൂരിലുള്ള വീട്ടില്‍ മകള്‍ക്കൊപ്പം കാണുമ്ബോഴാണ് തന്നെക്കുറിച്ച്‌ ബിജുരമേശ് നടത്തിയ മോശം പരാമര്‍ശം കേള്‍ക്കാനിടയായതെന്ന് അഭിഭാഷകയായ പരാതിക്കാരി പരാതിയില്‍ പറയുന്നു. ലൈംഗിക അതിപ്രസരത്തോടെയുള്ള പ്രസ്താവന തനിക്ക് കടുത്ത മാനഹാനിയും അപമാനവും വരുത്തിയെന്നും പരാതിയില്‍ പറയുന്നു. ബിജുരമേശിനു പുറമേ വാര്‍ത്താ ചാനലിന്റെ കണ്ണൂര്‍ ന്യൂസ് എഡിറ്റര്‍, കണ്ണൂര്‍ സിറ്റി പൊലീസ് കമ്മിഷണര്‍ എന്നിവരും ജനുവരി 8 നകം വിശദീകരണം നല്‍കണം.
