ചരക്കുലോറിയും, ഗ്യാസ് സിലിണ്ടറുമായി വന്ന ലോറിയും കൂട്ടിയിടിച്ച് ഒരുമരണം; ഒഴിവായത് വന്ദുരന്തം
തൃശൂര്: കുറുമാലിയില് ചരക്കുലോറിയും, ഗ്യാസ് സിലിണ്ടറുമായി വന്ന ലോറിയും കൂട്ടിയിടിച്ചുണ്ടായ അപകടത്തില് ഡ്രൈവര് മരിച്ചു. ഗ്യാസ് സിലിണ്ടര് കയറ്റിവന്ന ലോറിയിലെ ഡ്രൈവര് ഇടുക്കി നെടുങ്കണ്ടം സ്വദേശി കുന്നത്ത് വീട്ടില് തോമസിന്റെ മകന് സജി (50) ആണ് മരിച്ചത്.
ഇന്നുരാവിലെ 8.30നാണ് അപകടം. കുറുമാലിയില് യു ടേണ് തിരിയുകയായിരുന്ന ചരക്ക് ലോറിയുടെ പുറകില് ഗ്യാസ് സിലിണ്ടര് കയറ്റിവന്ന ലോറി ഇടിക്കുകയായിരുന്നു. ഇടിയുടെ ആഘാതത്തില് ലോറിയുടെ മുന്ഭാഗം തകര്ന്നു. ലോറി വെട്ടിപ്പൊളിച്ചാണ് ഡ്രൈവറെ പുറത്തെടുത്തത്. ഡ്രൈവറെ ഉടനെ തൃശൂരിലെ സ്വകാര്യ ആശുപത്രിയില് എത്തിച്ചെങ്കിലും ജീവന് രക്ഷിക്കാനായില്ല. ഗ്യാസ് സിലിണ്ടര് കയറ്റിവന്ന ലോറിയില് എല്ലാ സിലിണ്ടറും കാലി ആയതിനാല് വന് ദുരന്തം ഒഴിവായി. ചാലക്കുടി ഭാഗത്ത് നിന്നു തൃശൂര് ഭാഗത്തേക്ക് പോവുകയായിരുന്നു ഗ്യാസ് സിലിണ്ടര് കയറ്റിയ ലോറി. പുതുക്കാട് പോലീസും ഫയര് ഫോഴ്സും സ്ഥലത്ത് എത്തിയിരുന്നു.