ഉണ്ണികുളം KSEB ഓഫീസ് പുതിയ കെട്ടിടത്തിലേക്ക്
കൊയിലാണ്ടി: കെ.എസ്.ഇ.ബി ഉണ്ണികുളം സെക്ഷന് ഓഫീസ് പ്രവര്ത്തനം വ്യാഴാഴ്ച മുതല് പുതിയ കെട്ടിടത്തിലേക്ക് മാറി. വര്ഷങ്ങളായി ഉണ്ണികുളം പഞ്ചായത്ത് ഓഫീസിനടുത്തുള്ള ചെറിയ കെട്ടിടത്തില് സ്ഥല പരിമിതികള്ക്കിടയിലായിരുന്നു ഓഫിസ് പ്രവര്ത്തിച്ചിരുന്നത്. എകരൂല് കാപ്പിയില് റോഡില് പഴയ സീമ ടാക്കീസിനു സമീപത്തെ കെട്ടിടത്തിലേക്കാണ് ഓഫിസ് മാറ്റിയത്.
പുതിയ കെട്ടിടത്തിലേക്ക് മാറ്റിയതോടെ ഓഫീ സ് പ്രവര്ത്തനങ്ങള് കൂടുതല് സുഗമമാകും. കെട്ടിടത്തിലെ അസൗകര്യങ്ങള് കാരണം വൈദ്യുതി ബില്ലടക്കാനും മറ്റ് ആവശ്യങ്ങള്ക്കും ഓഫിസിലെത്തുന്ന ഉപഭോക്താക്കള് ഏറെ ബുദ്ധിമുട്ടനുഭവിച്ചിരുന്നു. ശിവപുരം, ഉണ്ണികുളം, കിനാലൂര് കൂടാതെ സമീപ പഞ്ചായത്തുകളിലെ ഏതാനും ഭാഗങ്ങളും കിനാലൂര് ഇന്ഡസ്ട്രിയല് ഏരിയ ഉള്പ്പെടെയുള്ള ഭാഗങ്ങളും ഈ ഓഫീസ് പരിധിയിലാണ്.
താല്ക്കാലികക്കാര് ഉള്പ്പെടെ 37 ജീവനക്കാര് ജോലിചെയ്യുന്നതും 22,000ത്തോളം ഉപഭോക്താക്കളുമുള്ള ഓഫിസില് ഉപകരണങ്ങളും മറ്റും നിറഞ്ഞ് ഏറെ ദുരിതത്തിലായിരുന്നു ദൈനംദിന പ്രവര്ത്തനങ്ങള്. നാട്ടുകാരുടെയും ജീവനക്കാരുടെയും വര്ഷങ്ങളായുള്ള ആവശ്യമായിരുന്നു പുതിയ ഓഫിസ് കെട്ടിടമെന്നത്. സെക്ഷന് ഓഫീസ് മെച്ചപ്പെടുമ്പോള് ഈ മേഖലയിലെ വൈദ്യുതി ഉപഭോക്താക്കളുടെ പ്രശ്നങ്ങള്ക്ക് പരിഹാരമാകുമെന്നാണ് പ്രതീക്ഷ.
സര്ക്കാറിൻ്റെ സമ്പൂ ര്ണ വൈദ്യുതീകരണ പദ്ധതിയുടെ ഭാഗമായി സാഗി പദ്ധതിയില് ഉള്പ്പെടുത്തി എട്ടു കോടിയുടെ വികസന പ്രവര്ത്തനങ്ങള് ഈ ഓഫീസ് പരിധിയില് നടപ്പാക്കിയതായി അസി. എന്ജിനീയര് ഇ.എം. വിപിന് പറഞ്ഞു. പുതിയ ഓഫീസ് കെട്ടിടത്തിൻ്റെ ഉദ്ഘാടനം കെ.എസ്.ഇ.ബി ഉത്തര മേഖല ഡിസ്ട്രിബ്യൂഷന് ചീഫ് എന്ജിനീയര് എം.എ. ടെന്സന് നിര്വഹിച്ചു.
കോഴിക്കോട് സര്ക്കിള് ഡെപ്യൂട്ടി ചീഫ് എന്ജിനീയര് ബോസ് ജേക്കബ്, ബാലുശ്ശേരി എക്സിക്യൂട്ടിവ് എന്ജിനീയര് നിഷ ബാനു, അസി. എക്സിക്യൂട്ടിവ് എന്ജിനീയര് വിജയകുമാര്, തിരുവമ്പാടി അസി. എക്സിക്യൂട്ടിവ് എന്ജിനീയര് മനോജ് തുടങ്ങിയവര് പങ്കെടുത്തു.