അയ്യപ്പഭക്തര്‍ സഞ്ചരിച്ചിരുന്ന ബസ് ലോറിയിൽ ഇടിച്ച് ഒരാൾ മരിച്ചു
പെരുമ്പാവൂര്‍: അയ്യപ്പഭക്തര്‍ സഞ്ചരിച്ചിരുന്ന മിനിബസ് തടി ലോറിയില്‍ ഇടിച്ച് ഒരാള്‍ മരിച്ചു. എംസി റോഡില്‍ ഒക്കല്‍ കാരിക്കോടിനടുത്തായിരുന്നു അപകടം. റോഡരികില്‍ നിര്‍ത്തിയിട്ടിരുന്ന തടി ലോറിക്ക് പിന്നിലാണ് മിനി ബസ് ഇടിച്ചത്.
ബസില്‍ ഉണ്ടായിരുന്ന 24 പേര്‍ക്ക് പരിക്കേറ്റു. തമിഴ്നാട് തിരുപ്പൂര്‍ സ്വദേശി പളനി സ്വാമിയുടെ മകന്‍ ധര്‍മലിംഗം (48) ആണ് മരിച്ചത്. ഗുരുതരമായി പരിക്കേറ്റ ഭൂപതിയെ ആലുവയിലെ സ്വകാര്യ ആശുപത്രിയില്‍ പ്രവേശിപ്പിച്ചു. മറ്റുള്ളവര്‍ പെരുമ്പാവൂരിലെ സ്വകാര്യ ആശുപത്രിയില്‍ ചികിത്സയിലാണ്. ചൊവ്വാഴ്ച പുലര്‍ച്ചെ 3.45 ഓടെയായിരുന്നു അപകടം.
ബസിന് പുറകെ വന്ന മറ്റൊരു കാറും ബസില്‍ ഇടിച്ചു. കാറില്‍ ഉണ്ടായിരുന്നവരെ പ്രഥമ ശുശ്രൂഷ നല്‍കി വിട്ടയച്ചു. അപകടത്തെത്തുടര്‍ന്ന് ബസില്‍ കുടുങ്ങിയവരെ പെരുമ്പാവൂരില്‍നിന്ന് എത്തിയ അഗ്നിരക്ഷാസേനയാണ് രക്ഷപ്പെടുത്തി ആശുപത്രിയില്‍ പ്രവേശിപ്പിച്ചത്. അപകടത്തില്‍ ബസിന്‍റെയും കാറിന്‍റെയും മുന്‍വശം പൂര്‍ണമായും തകര്‍ന്നു. മിനിബസിലും കാറിലുമുണ്ടായിരുന്നവര്‍ ശബരിമല തീര്‍ഥാടനത്തിനു പോകുകയായിരുന്നു.
