പാമ്പ് കടിയേറ്റ് മരിച്ച ഷഹല ഷെറിന്റെ വീട് രാഹുല് ഗാന്ധി സന്ദര്ശിച്ചു
സുല്ത്താന് ബത്തേരി : ഗവണ്മെന്റ് സര്വജന ഹയര് സെക്കന്ഡറി സ്കൂളില് പാമ്പ് കടിയേറ്റ് മരിച്ച അഞ്ചാം ക്ലാസ് വിദ്യാര്ത്ഥിനി ഷഹല ഷെറിന്റെ വീട് രാഹുല് ഗാന്ധി എം.പി സന്ദര്ശിച്ചു. ഷഹലയുടെ കുടുംബാംഗങ്ങളെ അദ്ദേഹം ആശ്വസിപ്പിച്ചു. സംഭവം നടന്ന സര്വജന സ്കൂളും അദ്ദേഹം സന്ദര്ശിച്ചു.
ഉച്ചക്ക് 12.30 ഓടെയാണ് സുല്ത്താന് ബത്തേരി പുത്തന്കുന്നിലെ ഷഹല ഷെറിന്റെ വീട്ടില് സന്ദര്ശനം നടത്തിയത്. ഷഹലയുടെ മാതാപിതാക്കളുമായും ബന്ധുക്കളുമായി അദ്ദേഹം ആശയവിനിമയം നടത്തി. വയനാട്ടിലെ ചികിത്സാ സൗകര്യങ്ങളുടെ അപര്യാപ്തത പരിഹരിക്കാന് ആവശ്യമായ ഇടപെടല് നടത്തുമെന്ന് അദ്ദേഹം പറഞ്ഞു.
തുടര്ന്ന് സര്വജന സ്കൂളില് എത്തിയ അദ്ദേഹം അധ്യാപകരില് നിന്ന് വിവരങ്ങള് ചോദിച്ചറിഞ്ഞു. ഷഹലയ്ക്ക്പാമ്ബുകടിയേറ്റ ക്ലാസ് മുറിയും അദ്ദേഹം സന്ദര്ശിച്ചു. മൂന്നു ദിവസത്തെ സന്ദര്ശനത്തിനായി കേരളത്തില് എത്തിയതായിരുന്നു രാഹുല് ഗാന്ധി. നേരത്തെ ഷഹല ഷെറിന്റെ കുടുംബത്തിന് പത്തു ലക്ഷം രൂപ മുഖ്യമന്ത്രിയുടെ ദുരിതാശ്വാസ നിധിയില് നിന്ന് അനുവദിക്കാന് തീരുമാനിച്ചിരുന്നു. ഇന്ന് ചേര്ന്ന മന്ത്രിസഭാ യോഗത്തിലായിരുന്നു തീരുമാനം.