പിഷാരികാവിൽ വൻ സുരക്ഷാ സംവിധാനം ഒരുക്കാൻ പൊലീസ്

കൊയിലാണ്ടി: കൊല്ലം പിഷാരികാവ് ക്ഷേത്ര കാളിയാട്ട മഹോത്സവത്തിന് പോലീസ് വൻ സുരക്ഷാ സംവിധാനം ഏർപ്പെടുത്തുന്നു. പ്രധാന ഉത്സവ ദിവസങ്ങളായ ഏപ്രിൽ 4, 5 തിയ്യതികളിലാണ് സുരക്ഷ ശക്തമാക്കുന്നത്. വിവിധ സ്റ്റേഷനുകളിൽ നിന്നായി 300 ഓളം പോലീസുകാരെയായിരിക്കും വിന്യസിക്കുക. കൂടാതെ, വനിതാ പോലീസ്, മഫ്ടി പോലീസ്, തുടങ്ങിയവരും നിരീക്ഷണത്തിന് ഉണ്ടാവും. റൂറൽ എസ്.പി.അരവിന്ദ് സുകുമാറിൻ്റെ നേതൃത്വത്തിൽ കൊയിലാണ്ടി സി.ഐ. മെൽവിൻ ജോസ്, എസ് ഐ. ജിതേഷിൻ്റെ ഏകോപനത്തിലായിരിക്കും സുരക്ഷാ ക്രമീകരണങ്ങൾ. ക്ഷേത്രപരിസരം സി.സി.ടി.വി. നിരീക്ഷണത്തിലായിരിക്കും. ഉത്സവത്തിനെത്തുന്നവർ വില കൂടിയ ആഭരണങ്ങൾ കഴിയുന്നതും ഒഴിവാക്കണമെന്ന് സി.ഐ. അറിയിച്ചു.