ബിഗ് ബോസ് സീസണ്‍ 13 ജേതാവുമായിരുന്ന സിദ്ധാര്‍ത്ഥ് ശുക്ല അന്തരിച്ചു
ഡല്‍ഹി: നടനും മോഡലുമായിരുന്ന സിദ്ധാര്‍ത്ഥ് ശുക്ല നിര്യാതനായി. 40 വയസ്സായിരുന്നു. 2019ലെ ബിഗ് ബോസ് സീസണ്‍ 13 ജേതാവുമായിരുന്ന താരം ഇന്ന് രാവിലെയാണ് ബോളിവുഡിനെയും ആരാധകരെയും ഞെട്ടിച്ച്‌ മരണത്തിന് കീഴടങ്ങിയത്. ഹൃദയാഘാതത്തെ തുടര്‍ന്ന് മുംബൈ കൂപര്‍ ആശുപത്രിയില്‍ എത്തിച്ചെങ്കിലും രക്ഷിക്കാനായില്ല. കഴിഞ്ഞ ദിവസം വരെ സമൂഹ മാധ്യമങ്ങളില്‍ സജീവമായിരുന്നു. ടോക്യോ പാരാലിമ്പിക്സില്‍ സുനില്‍ ആന്‍റിലും അവാനി ലേഖരയും മെഡല്‍ നേടിയതിനെ അഭിനന്ദിച്ചായിരുന്നു അവസാനമായി ട്വീറ്റ് ചെയ്തത്.
മോഡലിങ് രംഗത്ത് കരിയര്‍ തുടങ്ങിയ സിദ്ധാര്‍ഥ് ശുക്ല 2008ലെ ടി.വി പരിപാടിയായ ‘ബാബുല്‍ കാ ആംഘേന്‍ ഛോട്ടീ നായില്‍ നായക വേഷത്തിലെത്തിയാണ് അഭിനയത്തിന് തുടക്കമിടുന്നത്. തുടര്‍ന്ന്, നിരവധി പരമ്പരകളിലൂടെ ടെലിവിഷന്‍ ലോകത്ത് ചിര പ്രതിഷ്ഠ നേടിയ താരം ബാലിക വധു വില്‍ നടി പ്രത്യുഷ ബാനര്‍ജിക്കൊപ്പം അഭിനയിച്ച്‌ ശ്രദ്ധേയനായി. ബിഗ് ബോസ് സീസണ്‍ 13നു പുറമെ ഖത്രോന്‍ കെ ഖിലാഡി 7ലും ജേതാവായിരുന്നു.
ആലിയ ഭട്ടും വരുണ്‍ ധവാനും മുഖ്യറോളിലെത്തിയ ‘ഹംപ്റ്റി ശര്‍മ കി ദുല്‍ഹനിയ’, ബിസിനസ് ഇന്‍ ഖസാകിസ്താന്‍’ എന്നിവയിലും വേഷമിട്ടു. അന്തരിച്ച ശുക്ലക്ക് മാതാവും രണ്ടു സഹോദരിമാരുമുണ്ട്. അജയ് ദേവ്ഗന്‍, അക്ഷയ് കുമാര്‍കപില്‍ ശര്‍മ, മാധുരി ദീക്ഷിത്, ബിപാഷ ബസു, മാധവന്‍ തുടങ്ങി നിരവധി പ്രമുഖര്‍ സിദ്ധാര്‍ഥ ശുക്ലക്ക് ആദരാഞ്ജലികളര്‍പിച്ചു.
