ട്രെയിനിൽ തീകൊളുത്തിയ സംഭവം 3 പേർ മരിച്ചു. 10 പേർക്ക് പരിക്ക്
ട്രെയിനിൽ സഹയാത്രികരെ പെട്രോൾ ഒഴിച്ച് തീകൊളുത്തിയ സംഭവം 3 പേർ മരിച്ചു.. 10 പേർക്ക് പരിക്ക്. ഇന്നലെ രാത്രി ആലപ്പുഴ കണ്ണൂർ എക്‌സിക്യൂട്ടീവ്‌ ട്രെയിനിൽ യാത്രാമധ്യേ എലത്തൂരിൽ വെച്ച് യാത്രക്കാരെ തീകൊളുത്തി കൊല്ലാൻ ശ്രമിച്ചസംഭവത്തിലാണ് എലത്തൂർ പാലത്തിന്‌ സമീപം റെയിൽവേ ട്രാക്കിൽ മൂന്ന്‌ മൃതദേഹങ്ങൾ കണ്ടെത്തിയത്. തിങ്കൾ പുലർച്ചെ ഒന്നരയോടെ മട്ടന്നൂർ സ്വദേശിനി റഹ്മത്ത്, സഹോദരിയുടെ മകൾ രണ്ടര വയസുകാരി സുഹറ എന്നിവരുടെയും ഒരു പുരുഷന്റെയും മൃതദേഹമാണ്‌ കണ്ടെത്തിയത്. മൃതദേഹങ്ങൾ മെഡിക്കൽ കോളേജ്‌ ആശുപത്രിയിലേക്ക്‌ മാറ്റി.
ഒമ്പത്‌ യാത്രക്കാർക്ക്‌ പൊള്ളലേറ്റു. ഞായർ രാത്രി 9.10ന്‌ ട്രെയിൻ എലത്തൂർ കോരപ്പുഴ പാലത്തിന്‌ മുകളിലെത്തിയപ്പോഴാണ്‌ ഡി വൺ കോച്ചിൽ യാത്രക്കാരൻ പെട്രോൾ സ്‌പ്രേ ചെയ്‌ത്‌ തീകൊളുത്തിയത്‌. ഒരാളുടെ പരിക്ക് സാരമുള്ളതാണ്‌. തീ കൊളുത്തിയ ആളെ തിരിച്ചറിഞ്ഞിട്ടില്ല. ഇയാൾ ട്രെയിനിൽനിന്ന്‌ ചാടി രക്ഷപ്പെട്ടെന്ന്‌ മറ്റ്‌ യാത്രക്കാർ പറഞ്ഞു.
അഞ്ചുപേർ കോഴിക്കോട്‌ മെഡിക്കൽ കോളേജ്‌ ആശുപത്രിയിലും മൂന്നുപേർ ബേബി മെമ്മോറിയൽ ആശുപത്രിയിലും ചികിത്സയിലാണ്‌. പൊള്ളലേറ്റ ഒരാളെ കൊയിലാണ്ടി താലൂക്കാശുപത്രിയിലും പ്രവേശിപ്പിച്ചു. മറ്റൊരു ബോഗിയിൽ നിന്നെത്തിയ അക്രമി ഒരു പ്രകോപനവുമില്ലാതെ യാത്രക്കാർക്കുനേരെ പെട്രോൾ സ്‌പ്രേ ചെയ്‌ത്‌ തീകൊളുത്തുകയായിരുന്നു. തീ സമീപത്തെ സീറ്റുകളിലിരുന്ന യാത്രക്കാരുടെ വസ്‌ത്രങ്ങളിലേക്ക്‌ പടർന്നു. പരിഭ്രാന്തരായ യാത്രക്കാർ മറ്റു കംപാർട്ട്‌മെന്റുകളിക്കേ്‌ ഓടി. ഇതിനിടെ യാത്രക്കാരിലൊരാൾ അപായ ചങ്ങല വലിച്ചു. അക്രമിക്കായുള്ള അന്വേഷണം ഊർജിതമാക്കിയതായി പൊലീസും റെയിൽവേ പൊലീസും അറിയിച്ചു.
പരിക്കേറ്റ കതിരൂർ പൊയ്യിൽ ഹൗസിൽ അനിൽകുമാർ (50), ഭാര്യ സജിഷ (47), മകൻ അദ്വെത്‌ (21), മണ്ണൂത്തി മാനാട്ടിൽ വീട്ടിൽ അശ്വതി (29), തളിപ്പറമ്പിൽ നീലിമ ഹൗസിൽ റൂബി (52) എന്നിവരാണ്‌ മെഡിക്കൽ കോളേജ്‌ ആശുപത്രിയിൽ ചികിത്സയിലുള്ളത്‌. തളിപ്പറമ്പ്‌ സ്വദേശി ജ്യോതീന്ദ്രനാഥ്‌ (34), തൃശൂർ സ്വദേശി പ്രിൻസ് (35), കണ്ണൂർ സ്വദേശി പ്രകാശൻ (34) എന്നിവർ ബേബി മെമ്മോറിയൽ ആശുപത്രിയിലാണ്‌. ഒരാൾ കൊയിലാണ്ടി താലൂക്ക് ആശുപത്രിയിലും ചികിത്സയിലുണ്ട്.
സംഭവമറിഞ്ഞ്‌ ജില്ലാ പൊലീസ്‌ മേധാവി രാജ്‌പാൽ മീണ, എസിപി ബി ബിജുരാജ്‌ എന്നിവർ സ്ഥലത്തെത്തി. രാത്രി ഉന്നത പൊലീസ്‌ ഉദ്യോഗസ്ഥരുടെ യോഗം എലത്തൂർ സ്‌റ്റേഷനിൽ ചേർന്നു. അപകടവിവരമറിഞ്ഞയുടനെ റെയിൽവേ പൊലീസ്‌ ഫയർഫോഴ്‌സിന്റെ സഹായം തേടി. ഉടൻ തന്നെ കോഴിക്കോട്‌ ബീച്ച്‌, കൊയിലാണ്ടി എന്നിവിടങ്ങളിൽനിന്നും ഫയർ യൂണിറ്റും എലത്തൂർ പൊലീസും സ്ഥലത്തെത്തി.
