നായകളുമായെത്തി ബാര്‍ അടിച്ചു തകര്‍ത്ത കേസിലെ പ്രതികള്‍ പിടിയില്‍
തൃശൂര്‍: തൃശൂരില്‍ നായകളുമായെത്തി ബാര്‍ അടിച്ചു തകര്‍ത്ത കേസിലെ പ്രതികള്‍ പിടിയില്‍. തൃശൂര്‍ പൂങ്കുന്നം വെട്ടിയാട്ടില്‍ വൈശാഖ്, അഞ്ചേരി കുറിയച്ചിറ നെല്ലിക്കല്‍ വൈശാഖ് എന്നിവരാണു പിടിയിലായത്. സംഭവത്തിനു ശേഷം ഒളിവിലായിരുന്ന പ്രതികള്‍ മൊബൈല്‍ ഫോണ്‍ ഉപയോഗിച്ചിരുന്നില്ല. എന്നാല്‍ കഴിഞ്ഞ ദിവസം ഇവരില്‍ ഒരാള്‍ ഫേസ്ബുക് ലൈവില്‍ വന്നു. ഇതോടെ പോലീസ് പ്രതികളെ കുടുക്കുകയായിരുന്നു.
സെപ്റ്റംബര്‍ 21-ന് പഴയന്നൂരിലെ രാജ് ബാറിലാണു പ്രതികള്‍ ആക്രമണം നടത്തിയത്. നാലു ജര്‍മന്‍ ഷെപ്പേര്‍ഡ് നായകളുമായെത്തിയ പ്രതികള്‍ വടിവാള്‍ വീശി വിരട്ടിയ ശേഷം ബാര്‍ അടിച്ചുതകര്‍ക്കുകയായിരുന്നു. പ്രതികള്‍ ഇരുവരും നായ്ക്കളെ പരിശീലിപ്പിക്കുന്നവരാണ്.
മദ്യപിച്ചതിന്‍റെ പണം നല്‍കാതിരുന്നതിനെത്തുടര്‍ന്നു ബാര്‍ ജീവനക്കാര്‍ പ്രതികളുടെ മൊബൈല്‍ ഫോണ്‍ പിടിച്ചുവച്ചിരുന്നു. ഇതാണു തര്‍ക്കത്തിനു കാരണമായത്. യുവാക്കള്‍ ബാര്‍ അടിച്ചുതകര്‍ക്കുന്നതിന്‍റെ സിസിടിവി ദൃശ്യങ്ങള്‍ പുറത്തുവന്നിരുന്നു.
