കടലില്‍ കുളിക്കുന്നതിനിടയില്‍ വിദ്യാര്‍ഥികള്‍ തിരയില്‍പ്പെട്ടു: ഒരാളെ കാണാതായി
കണ്ണൂര്‍: ഓണാഘോഷത്തിന് പയ്യാന്പലത്ത് എത്തിയ വിദ്യാര്‍ഥികള്‍ കടലില്‍ കുളിക്കുന്നതിനിടയില്‍ തിരയില്‍പ്പെട്ടു. ഒരാളെ കാണാതായി. രണ്ടുപേരെ ലൈഫ് ഗാര്‍ഡ് രക്ഷപ്പെടുത്തി. തോട്ടട അജയ് നിവാസിലെ മനോജിന്‍റെ മകന്‍ അഖിലിനെ(11)യാണ് കാണാതായത്. അഖിലിനൊപ്പം ജ്യേഷ്ഠന്‍ നിഖില്‍, കൂട്ടുകാരായ വസന്ത്, സച്ചിന്‍, നിതീഷ്, സുമേഷ് എന്നിവരാണ് പയ്യാന്പലത്ത് കടലില്‍ കുളിക്കാനെത്തിയത്.
തിരുവോണ നാളില്‍ ഉച്ചകഴിഞ്ഞ് 2.30 ഓടെയായിരുന്നു സംഭവം. കടലില്‍ ഇറങ്ങിയ വിദ്യാര്‍ഥികള്‍ കുളിക്കുന്നതിനിടെ തിരയില്‍പ്പെടുകയായിരുന്നു. തോട്ടട വെസ്റ്റ് യുപി സ്കൂളില്‍ ആറാംക്ലാസ് വിദ്യാര്‍ഥിയാണ് അഖില്‍. കടലില്‍നിന്നു രക്ഷപ്പെടുത്തിയ സച്ചിനെ ജില്ലാ ആശുപത്രിയില്‍ പ്രവേശിപ്പിച്ചിരിക്കുകയാണ്. തിരക്ക് കാരണം കടലില്‍ ഇറങ്ങിയ ഭൂരിഭാഗം പേരെയും ലൈഫ് ഗാര്‍ഡ് നിയന്ത്രിച്ചിരുന്നു. മറ്റു കുട്ടികള്‍ ബഹളം വച്ചപ്പോഴാണ് അഖിലും മറ്റും രണ്ടുപേരും തിരയില്‍പ്പെട്ടത് അറിയുന്നത്.
തിരുവോണ ദിവസം രാവിലെ പത്തിനാണ് അഖിലും സുഹൃത്തുക്കളും തോട്ടടയില്‍ നിന്നും കണ്ണൂരിലേക്ക് പുറപ്പെട്ടത്. അഖിലിനു വേണ്ടി മുങ്ങല്‍ വിദഗ്ധരും കോസ്റ്റല്‍ പോലീസും ആരംഭിച്ച തെരച്ചില്‍ ഇന്നും തുടരുകയാണ്. വിവരമറിഞ്ഞ് ജില്ലാകളക്ടറുടെ നിര്‍ദേശപ്രകാരം ആര്‍ഡിഒ ഉള്‍പ്പെടെ ഉദ്യോഗസ്ഥരും പയ്യാന്പലത്തെത്തിയിരുന്നു.
