സനാതന ധര്മ വിവാദത്തില് ഉദയനിധി സ്റ്റാലിനെതിരായ പരാതി തള്ളി മദ്രാസ് ഹൈക്കോടതി
ചെന്നൈ: സനാതന ധര്മ വിവാദത്തില് ഉദയനിധി സ്റ്റാലിനെതിരായ പരാതി തള്ളി മദ്രാസ് ഹൈക്കോടതി. ഉദയനിധിക്ക് മന്ത്രിയായി തുടരാമെന്ന് മദ്രാസ് ഹൈക്കോടതി ഉത്തരവിട്ടു. അതേസമയം, മന്ത്രി എന്ന നിലയില് ഉദയനിധി വിവാദ പരാമര്ശം നടത്താന് പാടില്ലായിരുന്നുവെന്നും സമൂഹത്തില് ഭിന്നതക്ക് കാരണമാകുന്ന പരാമര്ശം നടത്തരുതായിരുന്നുവെന്നും സംഭവത്തില് കോടതി നിരീക്ഷിച്ചു.
സനാതന ധര്മത്തിനെതിരായ പരാമര്ശത്തിന് ശേഷം ഉദയനിധി മന്ത്രിപദവിയില് തുടരുന്നത് ചോദ്യം ചെയ്ത് ആര്എസ്എസ് പ്രവര്ത്തകനായ ടി. മനോഹര് നല്കിയ ഹര്ജിയില് ജസ്റ്റിസ് അനിത സുമന്ത് ആണ് വിധി പറഞ്ഞത്. സെപ്റ്റംബറിലെ വിവാദപരാമര്ശ സമയത്ത് വേദിയില് ഉണ്ടായിരുന്ന ദേവസ്വം മന്ത്രി ശേഖര് ബാബു, എ. രാജ എംപി എന്നിവരെ പുറത്താക്കണമെന്നും ഹര്ജിയില് ആവശ്യം ഉണ്ടായിരുന്നു.