കരുവണ്ണൂരിൽ കിണറ്റിൽ വീണ വീട്ടമ്മയെ രക്ഷപ്പെടുത്തി
പേരാമ്പ്ര: കരുവണ്ണൂരിൽ കിണറ്റിൽ വീണ വീട്ടമ്മയെ പേരാമ്പ്ര അഗ്നിരക്ഷസേനയും നാട്ടുകാരും ചേർന്ന് രക്ഷപ്പെടുത്തി. ബുധനാഴ്ച രാവിലയോടെയായിരുന്നു സംഭവം. കുറ്റിയുള്ളതിൽ സതി (60) യാണ് 60 അടി താഴ്ചയുള്ള കിണറ്റിൽ വീണത്.
അയൽവാസികളായ പേരാമ്പ്ര ഫയർ സ്റ്റേഷനിലെ ഹോം ഗാർഡ് എ. സി. അജീഷും വെങ്ങിലാട്ട് ഹാരിസും കിണറ്റിലിറങ്ങുകയും കയറിൽ തൂങ്ങി നിന്ന് അഗ്നിരക്ഷസേന എത്തുന്നതുവരെ വീട്ടമ്മയെ താങ്ങിനിർത്തുകയും ചെയ്തു. അപകടത്തിൽ ഇവരുടെ കൈക്ക് ചെറിയ പരിക്കേറ്റിട്ടുണ്ട്.
അസിസ്റ്റൻ്റ് സ്റ്റേഷൻ ഓഫീസർ പി. വിനോദിൻ്റെ നേതൃത്വത്തിൽ ഓഫീസർ ഇ. എം. പ്രശാന്ത്, പി. ആർ. സത്യനാഥ്, എ. കെ. ഷിഗിൻ ചന്ദ്രൻ, ആർ. ജിനേഷ്, ഹോം ഗാർഡ് എൻ. എം. രാജീവൻ എന്നിവർ ചേർന്ന് രക്ഷാപ്രവർത്തനങ്ങൾ നടത്തി.