ലയണൽ മെസി വിരമിച്ച ശേഷമുള്ള ആദ്യ മത്സരത്തിൽ അർജന്റീനയ്ക്ക് തോൽവി

.

അന്താരാഷ്ട്ര ഫുട്ബോളിൽ നിന്ന് ലയണൽ മെസി വിരമിച്ച ശേഷമുള്ള ആദ്യ മത്സരത്തിൽ അർജന്റീനയ്ക്ക് തോൽവി. വെള്ളിയാഴ്ച നടന്ന സൗഹൃദ മത്സരത്തിൽ ഉറുഗ്വേ ഒന്നിനെതിരെ രണ്ട് ഗോളുകൾക്കാണ് അർജന്റീനയെ പരാജയപ്പെടുത്തിയത്. പുതിയ പരിശീലകൻ ഡിയേഗോ ഫോർലാന്റെ കീഴിൽ ഉറുഗ്വേ നേടുന്ന മൂന്നാമത്തെ വിജയമാണിത്. രണ്ടാം പകുതിയിൽ അർജൻ്റീനിയൻ പ്രതിരോധ താരം ലിയനാർഡോ ബലേർഡി വഴങ്ങിയ സെൽഫ് ഗോളും ഉറുഗ്വേ മധ്യനിര താരം മാക്സി അറോഹോ നേടിയ ഗോളുമാണ് അർജന്റീനയ്ക്ക് തിരിച്ചടിയായത്.

73-ാം മിനിറ്റിൽ അത്ലറ്റിക്കോ മാഡ്രിഡ് താരം ജൂലിയൻ അൽവാരസ് അർജന്റീനയ്ക്കായി ഒരു ഗോൾ മടക്കിയെങ്കിലും സമനില ഗോൾ നേടാൻ ടീമിനായില്ല. മത്സരത്തിന്റെ ആദ്യ പകുതിയിൽ ഇരുടീമുകൾക്കും കാര്യമായ മുന്നേറ്റങ്ങൾ നടത്താനായില്ല. രണ്ടാം പകുതി ആരംഭിച്ച് അധികം വൈകാതെ ഉറുഗ്വേ ലീഡ് നേടി. ജോർജിയൻ ഡി അരാസ്കേറ്റയുടെ ഫ്രീകിക്കിൽ അർജന്റീന പ്രതിരോധത്തിൽ ആശയക്കുഴപ്പമുണ്ടായി.

പന്ത് ഹെഡറിലൂടെ ക്ലിയർ ചെയ്യാൻ ശ്രമിച്ച മാഞ്ചസ്റ്റർ യുണൈറ്റഡ് താരം ലിസാൻഡ്രോ മാർട്ടിനസിന്റെ നീക്കം പിഴച്ചു. പന്ത് സഹതാരം ബലേർഡിയുടെ ദേഹത്ത് തട്ടി സ്വന്തം വലയിലെത്തുകയായിരുന്നു. 53-ാം മിനിറ്റിൽ ഉറുഗ്വേ ലീഡ് രണ്ടാക്കി ഉയർത്തി. ഡി അരാസ്കേറ്റ എടുത്ത കോർണർ മാക്സി അറോഹോയുടെ തോളിൽ തട്ടി ഉയർന്ന് വലയിലേക്ക് പതിക്കുകയായിരുന്നു.

73-ാം മിനിറ്റിൽ അൽവാരസിന്റെ തകർപ്പൻ ഷോട്ടിലൂടെ അർജന്റീന ഉറു​ഗ്വേയുടെ വല കുലുക്കി. ഇഞ്ചുറി ടൈമിലും അൽവാരസിന് സമനില നേടാൻ അവസരം ലഭിച്ചെങ്കിലും ഉറുഗ്വേ പ്രതിരോധനിര ആ ശ്രമത്തെ തടഞ്ഞു. കഴിഞ്ഞ മാസം ബെനിനെതിരായ സൗഹൃദ മത്സരത്തിലായിരുന്നു മെസി അർജന്റീനയ്ക്കായി അവസാനമായി കളിച്ചത്. 207 മത്സരങ്ങളിൽ നിന്ന് 125 ഗോളുകൾ നേടിയ ശേഷമാണ് 39-കാരനായ ഇതിഹാസതാരം പടിയിറങ്ങിയത്.