ഇന്ന് ദേശീയ ശിശുദിനമായി ആചരിക്കുന്നു
ഇന്ത്യയുടെ പ്രഥമ പ്രധാനമന്ത്രി പണ്ഡിറ്റ് ജവഹർലാൽ നെഹ്‌റുവിന്റെ ജന്മദിനമാണ് നാം ശിശുദിനമായി ആചരിക്കുന്നത്. 1889 നവംബർ 14ന് അലഹബാദിൽ ജനിച്ച നെഹ്‌റുവിന് കുട്ടികളോട് പ്രത്യേക സ്നേഹവും അടുപ്പവുമുണ്ടായിരുന്നു. കുട്ടികൾ അദ്ദേഹത്തെ സ്നേഹപൂർവം ചാച്ചാ നെഹ്‌റു’ എന്ന് വിളിച്ചു. കുട്ടികളുടെ വിദ്യാഭ്യാസത്തിനും ക്ഷേമത്തിനും രാജ്യത്തിന്റെ പുരോഗതിയിൽ വലിയ സ്ഥാനമുണ്ടെന്ന് വിശ്വസിച്ചിരുന്ന അദ്ദേഹത്തോടുള്ള ആദരസൂചകമായാണ് 1964 മുതൽ നവംബർ 14 ശിശുദിനമായി ആചരിച്ചുവരുന്നത്.
കാലം മാറിയെങ്കിലും കുട്ടികളുടെ ലോകം നേരിടുന്ന വെല്ലുവിളികൾക്ക് പൂർണമായ പരിഹാരമായിട്ടില്ല. ബാലവേല, കുട്ടികൾക്കെതിരായ അതിക്രമങ്ങൾ, ഓൺലൈൻ ചൂഷണം, പോഷകാഹാരക്കുറവ്, വിദ്യാഭ്യാസത്തിലെ അസമത്വം തുടങ്ങി നിരവധി പ്രശ്നങ്ങൾ ഇന്നും സമൂഹത്തിന് മുന്നിൽ വലിയ ചോദ്യചിഹ്നമായി നിൽക്കുന്നു. സാങ്കേതികവിദ്യയുടെ വളർച്ച കുട്ടികൾക്ക് പുതിയ പഠന സാധ്യതകൾ തുറക്കുമ്പോൾ തന്നെ, സൈബർ ഭീഷണികളും അനാരോഗ്യകരമായ ഡിജിറ്റൽ ഇടപെടലുകളും പുതിയ കാലത്തിന്റെ ആശങ്കകളായി മാറുകയാണ്.
ഓരോ കുട്ടിക്കും വിദ്യാഭ്യാസം നേടാനും സുരക്ഷിതമായി ജീവിക്കാനും സ്വന്തം അഭിപ്രായങ്ങൾ പ്രകടിപ്പിക്കാനും കളിക്കാനും സ്വപ്നം കാണാനും അവകാശമുണ്ട്. എന്നാൽ ഇത്തരം അവകാശങ്ങൾ വെറും നിയമങ്ങളിലും പ്രഖ്യാപനങ്ങളിലും മാത്രം ഒതുങ്ങാതെ കുട്ടികളുടെ ജീവിതത്തിൽ യാഥാർഥ്യമാകേണ്ടതുണ്ട്. കുട്ടികളുടെ പ്രശ്നങ്ങൾ കേൾക്കാനും അവരുടെ താൽപര്യങ്ങൾക്ക് മുൻഗണന നൽകാനും കുടുംബവും വിദ്യാലയങ്ങളും ഭരണകൂടവും ഒരുപോലെ തയ്യാറാകണം. കുട്ടികളുടെ ശാരീരികവും മാനസികവുമായ വളർച്ചയ്ക്ക് അനുയോജ്യമായ സുരക്ഷിത സാഹചര്യം ഒരുക്കുന്നതും സമൂഹത്തിന്റെ ഉത്തരവാദിത്വമാണ്.
