കൊരയങ്ങാട് കലാക്ഷേത്രത്തിൽ നവരാത്രി ആഘോഷത്തിന് തുടക്കം കുറിച്ചു

കൊയിലാണ്ടി: കലാരംഗത്ത് പതിനാറ് വർഷത്തെ അർപ്പണ -സേവന പാരമ്പര്യം നിലനിർത്തി വരുന്ന കൊയിലാണ്ടിയിലെ പ്രശസ്ത കലാ സ്ഥാപനമായ കൊരയങ്ങാട് കലാക്ഷേത്രത്തിൽ നവരാത്രി ആഘോഷത്തിന് തുടക്കം കുറിച്ചു. ഞായറാഴ്ച വൈകീട്ട് ഡോ. ഗോപിനാഥും പാലക്കാട് പ്രേംരാജ് മാസ്റ്ററും ചേർന്ന് ഭദ്രദീപം കൊളുത്തി. കലാക്ഷേത്രം സംഗീത വിദ്യാർത്ഥികൾ അവതരിപ്പിച്ച സംഗീതാർച്ചനയും, ചിത്രകലാ വിദ്യാർത്ഥികളുടെ ചിത്ര പ്രദർശനം, നടനചാരുതയിൽ അവതരിപ്പിച്ച നൃത്തനൃത്യങ്ങളും അരങ്ങേറി.

തുടർന്ന്, ഫ്ലവേഴ്സ് ചാനലിലൂടെ ശ്രദ്ധേയരായ ടീം പത്തനംതിട്ട രാജേഷ് കൊട്ടാരത്തിൽ, ഹരി ഉതിമൂട്, സുജിത് കോന്നി, രാഹുൽ മഠത്തിൽ, ബിനു മണിയാർ എന്നിവരുടെ നേതൃത്വത്തിൽ അവതരിപ്പിച്ച കോമഡിഷോ, ”ഇത് ഐറ്റം വേറെ” ചിരിയോ ചിരി എന്നിവ കലാസ്വാദകർക്ക് നവ്യാനുഭവം പകർന്നു. തുടർന്ന് സമ്മാന വിതരണവും നടത്തി. ഒക്ടോബർ 1 ന് നവമി പൂജ, 2ന് വിജയദശമി ചടങ്ങുകൾക്ക് ശേഷം കലാക്ഷേത്രം പുതിയ ബാച്ചിലേക്കുള്ള പ്രവേശനം ആരംഭിക്കുമെന്ന് കലാക്ഷേത്രം ഭാരവാഹികൾ അറിയിച്ചു. ദീപ സുനിൽ ഓർക്കാട്ടേരി (സംഗീതം), സായി പ്രസാദ് (ചിത്രകല), ആര്യ ദാസ് (നൃത്തം) എന്നീ അദ്ധ്യാപകരുടെ ശിക്ഷണത്തിലാണ് പഠനം.