മരളൂർ ശിവക്ഷേത്രത്തിലേക്കുള്ള അണ്ടർപാസിലെ വെള്ളക്കെട്ടും, ശോചനീയാവസ്ഥയും ഉടൻ പരിഹരിക്കണം
കൊയിലാണ്ടി: ബൈപ്പാസ് കടന്ന് പോകുന്ന കൊയിലാണ്ടി നഗരസഭയിലെ മരളൂർ ശിവക്ഷേത്രത്തിലേക്കുള്ള അണ്ടർപാസിലെ വെള്ളക്കെട്ടും, ശോചനീയാവസ്ഥയും ഉടൻ പരിഹരിക്കണമെന്ന് യൂത്ത് കോൺഗ്രസ് സംസ്ഥാന ജനറൽ സെക്രട്ടറിയും ജില്ലാ പഞ്ചായത്ത് മെമ്പറുമായ വി.പി ദുൽഖിഫിൽ പറഞ്ഞു. അണ്ടർപാസും,. ബൈപ്പാസിലെ പൈലിംഗിൽ തകരാറുകൾ സംഭവിച്ച വീടുകളും സന്ദർശിച്ചു.
അണ്ടർപാസിൽ വെള്ളവും ചെളിയും നിറഞ്ഞത് മൂലം കാൽനട യാത്ര പോലും ദുഷ്കരമായ അവസ്ഥയാണ്. പ്രദേശവാസികൾ കൈയിൽ നിന്നും പണം എടുത്ത് ചെളി നീക്കുന്ന അവസ്ഥയാണിപ്പോൾ. വിഷയത്തിൽ അധികൃതർ അടിയന്തര നടപടി സ്വീകരിച്ച് നാട്ടുകാരുടെ ദുരിത ജീവിതത്തിന് അറുതി വരുത്തണമെന്ന് വി.പി. ദുൽഖിഫിൽ പറഞ്ഞു.
ദേശീയ പാത അതോറിറ്റിക്ക് നേരിട്ട് പരാതി നൽകുമെന്നും അദ്ദേഹം അറിയിച്ചു. അഖിൽ രാജ് മരളൂർ, സത്യനാഥൻ തൈക്കണ്ടി,തങ്കമണി ചൈത്രം, ജയഭാരതി, അശോക് കുമാർ, സഗീഷ്, ഗിരീഷ് പുതുക്കുടി, വാസുദേവൻ പി. ടി, രാധാകൃഷ്ണൻ ടി. പി തുടങ്ങിയവരും ദുൽഖിഫിലിനോടെപ്പമുണ്ടായിരുന്നു.
