കേരളത്തിൽനിന്നുള്ള രണ്ട് ട്രെയിനുകൾ റദ്ദാക്കി; സർവീസ് നിയന്ത്രണം ഫെബ്രുവരിയിൽ
കേരളത്തിൽനിന്ന് ഉത്തരേന്ത്യയിലേക്ക് സർവീസ് നടത്തുന്ന രണ്ട് ട്രെയിനുകളുടെ സർവീസിൽ നിയന്ത്രണം. ഫെബ്രുവരി മാസത്തിൽ തെരഞ്ഞെടുത്ത ദിവസങ്ങളിലാണ് രണ്ട് ട്രെയിനുകൾ പൂർണമായും റദ്ദാക്കിയത്. തിരുവനന്തപുരം-കോർബ, കോർബ-തിരുവനന്തപുരം സൂപ്പർഫാസ്റ്റ് എക്സ്പ്രസും ഗോരഖ്പൂർ-തിരുവനന്തപുരം, തിരുവനന്തപുരം-ഗോരഖ്പുർ എക്സ്പ്രസുമാണ് റദ്ദാക്കിയത്.
തിരുവനന്തപുരം-കോർബ സൂപ്പർഫാസ്റ്റ് എക്സ്പ്രസ് (ട്രെയിൻ നമ്പർ 22648) ഫെബ്രുവരി മൂന്ന്, ആറ്, പത്ത് തീയതികളിലാണ് റദ്ദാക്കിയത്. കോർബ – തിരുവനന്തപുരം സൂപ്പർഫാസ്റ്റ് എക്സ്പ്രസ് (ട്രെയിൻ നമ്പർ 22647) ഫെബ്രുവരി അഞ്ച്, എട്ട്, പന്ത്രണ്ട് തീയതികളിലാണ് പൂർണമായും റദ്ദാക്കിയത്.
ഗോരഖ്പൂർ-തിരുവനന്തപുരം രപ്തിസാഗർ സൂപ്പർഫാസ്റ്റ് എക്സ്പ്രസ് (ട്രെയിൻ നമ്പർ 12511) ഫെബ്രുവരി ഏഴ്, ഒമ്പത് തീയതികളില്‍ പൂർണമായും റദ്ദാക്കി. ഫെബ്രുവരി 11, 12 തീയതികളില്‍ തിരുവനന്തപുരം-ഗോരഖ്പൂർ രപ്തിസാഗർ സൂപ്പർഫാസ്റ്റ് എക്സ്പ്രസ് (12512) പൂർണമായും റദ്ദാക്കി. വടക്കേയിന്ത്യയിലെ കനത്ത മൂടല്‍മഞ്ഞ് ട്രെയിൻ ഗതാഗതത്തെ സാരമായി ബാധിച്ചിട്ടുണ്ട്. ഇതുകാരണം ചില ട്രെയിനുകള്‍ വൈകിയോടുന്നതായി റെയില്‍വേ അറിയിച്ചു. പ്രതികൂല കാലാവസ്ഥ കണക്കിലെടുത്ത് 15 ഓളം ട്രെയിനുകളാണ് വൈകിയോടുന്നത്.
