തമിഴ്നാട് മത്സ്യതൊഴിലാളികളെ നടുക്കടലിൽ ആക്രമിച്ച് ശ്രീലങ്കൻ കടൽക്കൊള്ളക്കാർ
തമിഴ്നാട് മത്സ്യതൊഴിലാളികളെ നടുക്കടലിൽ ആക്രമിച്ച് ശ്രീലങ്കൻ കടൽക്കൊള്ളക്കാർ. തമിഴ്നാട് നാഗപ്പട്ടണത്തു നിന്നും മത്സ്യബന്ധനത്തിനായി പോയ മത്സ്യതൊഴിലാളികളെയാണ് ശ്രീലങ്കൻ കടൽക്കൊള്ളക്കാർ നടുക്കടലിൽ ആക്രമിച്ചത്. ആക്രമണത്തിൽ നാഗപ്പട്ടണം സ്വദേശികളും മൽസ്യത്തൊഴിലാളികളുമായ രാജേന്ദ്രൻ, രാജ്‌കുമാർ, നാഗലിംഗം എന്നിവർക്കാണ് പരുക്കേറ്റത്.
ആഴക്കടലിൽ മത്സ്യത്തൊഴിലാളികളുടെ ബോട്ട് തടഞ്ഞു നിർത്തി അവരുടെ ബോട്ടിലേക്ക് അതിക്രമിച്ച് കയറിയാണ് കടൽക്കൊള്ളക്കാർ ആക്രമണം നടത്തിയിട്ടുള്ളത്. ആക്രമണത്തിൽ മത്സ്യത്തൊഴിലാളികളുടെ വലയും ജിപിഎസ് ഉപകരണങ്ങളും കൊള്ളക്കാർ മോഷ്ടിച്ചു.സംഭവത്തിൽ 3 ലക്ഷം രൂപയുടെ നഷ്ടമുണ്ടായതായി ആക്രമണത്തിൽ പരുക്കേറ്റ് ചികിത്സയിൽ കഴിയുന്ന മത്സ്യത്തൊഴിലാളികൾ പറഞ്ഞു.
അതേസമയം തമിഴ്നാട് മത്സ്യതൊഴിലാളികൾക്ക് നേരെ ശ്രീലങ്കൻ കടൽക്കൊള്ളക്കാർ ഇത്തരത്തിൽ ആക്രമണം നടത്തുന്നത് പതിവാണെന്നും ഇതിനുമുൻപും സമാന സംഭവങ്ങൾ ആഴക്കടലിൽ ഉണ്ടായിട്ടുണ്ടെന്നും മത്സ്യത്തൊഴിലാളികൾ പറഞ്ഞു. വിഷയത്തിൽ തമിഴ്നാട് സർക്കാർ ഇടപെടണമെന്നും ഇത്തരം അതിക്രമങ്ങൾക്കെതിരെ ശക്തമായ നടപടിയെടുക്കാൻ കേന്ദ്ര സർക്കാരിൽ സ്വാധീനം ചെലുത്തണമെന്നും അവർ തമിഴ്നാട് സർക്കാരിനോട് ആവശ്യപ്പെട്ടു.
