ബേലൂർ മഖ്‌ന കർണാടകയിലേക്ക് മടങ്ങി
ബേലൂർ മഖ്‌ന കർണാടകയിലേക്ക് മടങ്ങി. പുലർച്ചെ നാലരയോടെയാണ് ബേലൂർ മഖ്‌ന കബനി നദി കടന്ന് മുള്ളൻകൊല്ലി പഞ്ചായത്തിലെ മരക്കടവിലെത്തിയത്‌. മരക്കടവ് പത്തേക്കർ ജോസിൻ്റെ തെങ്ങിൽ തോട്ടത്തിലും മരക്കടവ് പള്ളി തോട്ടത്തിൻ്റെ പരിസരത്തും എത്തിയ ആനയെ വനപാലകർ മറുകരയായ മച്ചൂരിലേക്ക് തുരത്തി.
വനപാലക സംഘം സ്ഥലത്ത് ആനയെ നിരീക്ഷിക്കുകയാണ്. മച്ചൂർ കർണാടകയിലെ ജനവാസ മേഖലയാണ്. ബാവലി മേഖലയിൽ നിന്ന് നാഗർഹോള കടുവാ സങ്കേതത്തിന്റെ ഉൾഭാഗത്തേക്ക്‌ രണ്ട്‌ ദിവസം മുൻപ്‌ ആന കയറിപ്പോയതിനാൽ വനം വകുപ്പ്‌ താൽക്കാലികമായി ദൗത്യം നിർത്തിയിരുന്നു. നിരീക്ഷണം തുടരുകയും ചെയ്തു. ഇന്ന് ലഭിച്ച സിഗ്നലുകളുടെ അടിസ്ഥാനത്തിൽ അതിവേഗമാണ്‌ വനം വകുപ്പ്‌ നടപടികളാരംഭിച്ചത്.
