കോഴിക്കോട് പെട്രോള്‍ പമ്പില്‍ ജീവനക്കാരൻറെ കണ്ണില്‍ മുളകുപൊടിയെറിഞ്ഞ് കവര്‍ച്ച
കോഴിക്കോട്: കോഴിക്കോട് ഓമശേരിയിൽ പെട്രോള്‍ പമ്പില്‍ ജീവനക്കാരൻറെ കണ്ണില്‍ മുളകുപൊടിയെറിഞ്ഞ് കവര്‍ച്ച. പുലര്‍ച്ചെ രണ്ടുമണിയോടെയാണ് ജീവനക്കാരനെ ആക്രമിച്ച് മോഷ്‌ടാക്കള്‍ പണം തട്ടിയെടുത്തത്. ജീവനക്കാരൻറെ കണ്ണില്‍ മുളകുപൊടി വിതറിയ ശേഷം ഉടുമുണ്ട് കൊണ്ട് മുഖം കെട്ടിയാണ് കീഴ്പെടുത്തിയത്. മറ്റൊരു ജീവനക്കാരനും ഈ സമയം പമ്പിൽ ഉണ്ടായിരുന്നെങ്കിലും ഭയന്ന്‌ അടുത്തേക്ക്‌ വന്നില്ല.
പതിനായിരത്തോളം രൂപ നഷ്‌ടമായെന്നാണ് പരാതി. മൂന്ന് യുവാക്കളും മോഷണശേഷം ഓടി രക്ഷപ്പെട്ടു. കവര്‍ച്ചയുടെയും അക്രമികള്‍ ഓടി രക്ഷപെടുന്നതിന്‍റെയും സിസിടിവി ദൃശ്യങ്ങള്‍ പുറത്തുവന്നു. പ്രതികളെ കുറിച്ച് ഇതുവരെ സൂചനകളില്ലെന്നും അന്വേഷണം പുരോഗമിക്കുകയാണെന്നും പൊലീസ് അറിയിച്ചു.
